Ýakynda, has takygy, 2024-nji ýylyň 8-nji oktýabrynda Tejen etrabynyň Altyn asyr şäheriniň sport mekdebinde gandbol boýunça Ahal welaýatynyň birinjiligi geçirilip, bu ýaryş uly ruhubelentlige, çekeleşikli pursatlara beslendi. Sport ýaryşy «Türkmenistan» Ýaşlar bedenterbiýe-sport guramasynyň Ahal welaýat bölüminiň, welaýatyň bedenterbiýe we sport baradaky Baş müdirliginiň guramagynda geçirildi.
Ýaşlaryň berk bedenli, sagdyn ruhly bolup ýetişmegini gazanmak, sport ussatlygyny ýokarlandyrmak hem-de güýçlüleri ýüze çykarmak maksady bilen geçirilen ýaryşda gandbolçy ýaşlar ukyp-başarnygyny görkezdiler. Ýeri gelende bellesek, gandbol oýny nerw ulgamyna oňaýly täsir edip, türgene sussupeslik, ýaltalyk, pikirleniş ukybynyň pes bolmagy, hereketsizlik ýaly häsiýetlere garşy göreşmäge we onuň öňüni almaga kömek edýär. Sportuň gandbol görnüşi bilen yzygiderli türgenleşmek çagalarda we ýetginjeklerde maksada okgunlylygy, erjelligi, zähmetsöýerligi we tutanýerliligi terbiýeleýär. Sportuň bu görnüşi bilen meşgullanýan türgenleriň ünsi we ýady ýiti bolup, bu aýratynlyklar onuň dürli ýaşdaky adamlar bilen dil tapyşmagyna kömek edýär.
Şeýlelikde, gandbolçy türgenleriň ençemesini jemlän ýaryşda Tejen etrabynyň Altyn asyr şäheriniň sport mekdebiniň toparyna taý tapylmady. Olar bäsdeşleriniň ählisinden üstün çykyp, ýaryşy birinji orunda tamamladylar. Ýaryşda Tejen etrabynyň sport mekdebi ikinji, Babadaýhan etrabynyň sport mekdebi bolsa ücünji ýerleri eýelediler.
Ýokary guramaçylykly geçirilen ýaryşyň ýeňijilerine guramaçylar tarapyndan Hormat hatlary we sowgatlar gowşuryldy.
Allak ALLAKOW,
Tejen etrabynyň Altyn asyr şäheriniň sport mekdebiniň müdiri.
