Soňky ýakyn wagtda türkmen türgenleriniň halkara ýaryşlaryndan getirýän täzelikleriniň hatary monjuk kimin düzülýär. Ispaniýanyň Pontewedre şäherinde Alp Arslan Begenjowyň ilkinji gezek erkin göreş boýunça dünýä çempiony bolmagy, Budapeştde (Wengriýa) geçirilen Bütindünýä küşt olimpiadasynda türkmen toparlarynyň kiçi altyn medallara mynasyp bolmaklary, ýakynda bolsa Türkmenistanyň agyr atletikaçysy Şahzatbek Matýakubowyň Ispaniýanyň Leon şäherinde geçirilen ýaşlaryň arasyndaky dünýä çempionatynda ýerine ýetirmegiň her görnüşinde we iki görnüşiň jemi boýunça dünýä rekordyny goýup, üç sany altyn medal gazanmagy taryhy wakalardyr. Ine, ýene-de hoş habar: Türkmenistanly kikboksingçileriň ýedisi dürli ýaş we agram derejeleri boýunça dünýä çempiony boldular! Ýer ýüzünden sportuň bu görnüşi boýunça 2,5 müňden gowrak iň güýçli türgeni özünde jemlän ýaryş ýakynda Özbegistanyň Daşkent şäherinde geçirildi.
Çempionata milli ýygyndymyzyň baş tälimçisi Orazmuhammet Kömekowyň ýolbaşçylygynda 15 türgen gatnaşdy. Şolaryň 12-siniň medallara mynasyp bolmagy türkmen ýygyndysynyň ýene bir halkara ýaryşda ýokary derejede çykyş edendigini görkezýär. Türgenlerimiziň ýedisi altyn, bäşisi bolsa bürünç medallary eýelediler.
Dünýä çempionlarymyzyň arasynda heniz 10 ýaşyny doldurmadyk çagalar hem, 17-18 ýaşly ýetginjekler hem bar. Türkmenistanly çempionlaryň iň kiçi ýaşlysy Muhamedaly Orazmuhammedowdyr. 9 ýaşly türgene 30 kilograma çenli agram derejesinde taý tapylmady. 14 ýaşly Nurmuhammet Joraýew 52, 15 ýaşly Rasul Rustamow 42, 17 ýaşly Serdar Bekenow 51, Kirill Woýewodin 54, Salamathan Baltaýew 86 we 18 ýaşly Akmyrat Akmyradow 67 kilograma çenli agram derejesinde hormat münberiniň iň ýokarky basgançagyna çykdylar. Üstümizdäki ýylda 14 ýaşyny dolduran Hangeldi Atabaýew 47, 16 ýaşly Guwanç Babaýew 48, Guwanç Mahmudow 51, Reşit Geldimämmedow 60, Yhlas Maýew bolsa 63,5 kilogramda bürünç medalyň eýesi boldular.
Ýeri gelende bellesek, Özbegistandaky ýaryş türkmen kikboksingçileriniň şu güýzde üstünlikli çykyş eden ikinji halkara ýaryşy boldy. Güýzüň ilkinji günlerinde ýetginjek kikboksingçilerimiz Budapeşt şäherinde geçirilen dünýä çempionatyna hem gatnaşyp, bäş medal eýeläpdiler. Şol toplumda altyn we kümüş medallaryň hersinden biri we üç sany bürünç medal bardy. Özbegistanda geçirilen ýaryşyň medalçylary Serdar Bekenow bilen Salamathan Baltaýewiň Budapeştdäki ýaryşdan hem medal bilen dolanandyklaryny ýatladýarys.
Atajan HYDYROW,
Ahal welaýatynyň Ak bugdaý etrabynyň sport mekdebiniň müdiri.
