Bilşimiz ýaly, «Apple» kompaniýasy 9-njy sentýabrda geçirilen güýzki tanyşdyrylyş dabarasynda «iPhone 16» smartfonyny hödürläpdi. Täze model birnäçe kämilleşmelere, şol sanda «Apple Intelligence» emeli aňyna eýe bolup, esasanam, smartfon kamera gönükdirilende obýektleri tanap, ses buýrugy bilen albomdaky suratlary gözläp bilýändigi bilen tapawutlandy.
Täze «iPhone 16» ulanyjylara daş-töweregindäki zatlar barada maglumat almaga mümkinçilik berer. Munuň üçin kamerany olara gönükdirmek ýeterlik. «iPhone 16» kamerany aňsat dolandyryş üçin basyş datçigi bilen «Capture Button» sensor düwmesini we öň diňe «Pro» görnüşlerde elýeterli bolan «Action Button» bilen üpjün edildi. Esasy modellerdäki kameralar dikligine ýerleşdirilip, bu birneme 2017-nji ýylyň «iPhone X»-niň dizaýnyny ýada salýar.
Şeýle-de «Apple» öňki «A16 Bionic» bilen deňeşdirilende 30% tiz bolan we 35% az energiýa sarp edýän «A18» prosessoryny hödürledi. Täze çip «iPhone 16»-a emeli aň funksiýalaryny netijeli dolandyrmaga we «Resident Evil 7 Biohazard» we «Assassin’s Creed: Mirage» ýaly «AAA» oýunlaryny işletmäge mümkinçilik berer. Täze «iPhone 16» we «iPhone 16 Plus» modelleri, degişlilikde, 6,1 we 6,7 dýuým «OLED» ekranlaryna eýe boldy. «iPhone 16»-nyň bahasy 799 dollar, «iPhone 16 Plus»-yň bahasy bolsa 899 dollardyr.
Altyn MÄMMETBERDIÝEWA,
TOHI-niň Agronomçylyk hünäriniň 2-nji ýyl talyby.
