Çaga okamagy, ýazmagy öwrenenden soň, oňa kitap okamagy öwretmek, hemişe ony lezzet bilen okamaga höwes döretmek ata-eneleriň, terbiýeçileriň, mugallymlaryň jana-jan borjudyr. Kitap okamak adama özüni gurşap alan dünýä, durmuşa, tebigat hadysalaryna, hut öz-özüne hem düşünmäge kömek edýär. Kitap hemmeleriň dostudyr hem mugallymydyr.
Çagalaryň ilkinji durmuş endiklerini maşgalada ele alýandyklaryny nazarda tutsak, çagany kitap bilen tanyşdyrmakda, ondaky suratlar barada gürrüň bermekde, kitap okamagyň peýdasyny düşündirmekde ata-eneleriň orny uludyr. Olaryň bu wajyp işde kitaba gyzyklanma döretmekdäki goldawy çaganyň okamak meýliniň kemala gelmegini üpjün edýär. Çagalaryň maşgala agzalary bilen bolan gatnaşygy beýleki adamlara, zatlara we ýaşaýşa bolan garaýyşlarynyň, kabul edýän häsiýetleriniň we hereketleriniň basgançagyny emele getirýär.
Çagalaryň ýaşyna görä her gün, yzygiderlilikde hekaýa, erteki okap bermek bilen olarda okamak endiginiň düýbi tutulýar. Öýde maşgala agzalarynyň hem çagalaryň peýdalanyp biljek ýerinde dürli temadan kitaplary özünde jemleýän kitap tekjesiniň bolmagy olaryň okamak endigini kämilleşdirýär. Kitaplaryň çagalaryň gyzyklanýan ugurlaryna, isleglerine görä, özleri bilen birlikde saýlanmagy olaryň okamaga bolan höwesini artdyrýar.
Bilşimiz ýaly, çagalyk döwri şahsyýetiň kemala gelýän döwrüdir. Okamak bolsa sagdyn şahsyýetiň kemala gelmegine ýardam edýär. Şunda ata-eneler we mugallymlar çagada okamak endigini kemala getirmekde we ösdürmekde gönüden-göni dahylly adamlardyr.
Çaganyň okaýşyna hemişe gözegçilik edip, ony höweslendirip durmaly. Olara häli-şindi kitap sowgat bermek hem täsirlidir. Ol kitap okamaga höwesiniň ýokdugyny özüne kemlik bilmelidir. Umuman aýdanyňda, ata-eneleriň bu meselede çagasyna berjek goldawy onuň geljegine düýpli täsir edýär.
Häzirki döwürde bilim-ylym ulgamy döwrebap ösdürilýär. Çagalar baglarynyň kitap tekjelerindäki ýaş aýratynlyklaryna görä saýlanyp goýlan dürli reňkli, özüneçekiji suratlar bilen bezelen kitaplardan başlap, mekdeplerdäki we ýokary okuw mekdeplerindäki kitaphanalar ýaşlaryň kitap okamaga bolan isleglerini kanagatlandyryp biljekdiginiň güwäsidir. Elektron kitaphanalar hem giň mümkinçilikleri döredýär.
Annabibi ATDYÝEWA,
Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň ýokary derejeli türkmen dili we edebiýat mugallymy.
