Samarkantda «Şark taronalari» («Gündogar mukamlary») atly XIII Halkara festiwaly dabaraly tamamlandy. Onda birinji orun eýelän Türkmenistanyň milli aýdym-saz toparynyň ýeňiş gazanmagy festiwalyň netijeleriniň garaşylmadyk ýakymly sowgady boldy.
Toparyň düzüminde ajaýyp sungat ussatlary toparyň aýdymçysy, Türkmenistanyň halk artisti Suhan Orazberdiýew, Türkmenistanyň halk artisti, depçi Hakberdi Allamyradow, dutarçy Döwlet Daňatarow, şeýle hem Maýa Kulyýewa adyndaky Türkmen milli konserwatoriýasynyň wekilleri Saparmyrat Amanmyradow (gyjak) we Allamyrat Muhammetgulyýew (gargy tüýdük) çykyş etdiler.
Guramaçylar ýeňijileri sylaglap, olara diplomlary, özboluşly mazmunly heýkeljik hem-de pul baýragyny gowşurdylar.
Festiwalyň Baş baýragyna Azerbaýjanyň «Semurg» topary mynasyp boldy. Hormat münberiniň ikinji basgançagyny zehinli toparlaryň ikisi: Gazagystandan «Atameken» we Özbegistandan «Makom Bend» eýelediler. Üçünji orny Ýaponiýanyň, Mongoliýanyň we Russiýanyň wekilleri paýlaşdylar.
«TürkmenGazet».
