Aşgabatda dowam edýän «Kids Ekspo: ähli zat çagalar üçin» atly halkara sergi-ýarmarkada daşary ýurtlaryň dürli öwüşginli ekspozisiýalaryna hem uly orun degişli. Olaryň arasynda Kanadanyň meşhur «ThinkSmart» bilim merkezi hem bar.
«Netijeli binýat» hususy kärhanasy Türkmenistanda Kanadanyň bilim maksatnamasynyň okadyş usulyýetine esaslanan bilim merkezini açmagy meýilleşdirýär.
– Biziň hödürleýän okuwymyz, ykdysadyýet boýunça Nobel baýragynyň eýesi Jeýms Hekmanyň ýörelgesine esaslanýar – diýip, «Netijeli binýat» kärhanasynyň wekili Parahat Atdakow aýdýar. – Çagalaryň bilimine irki, esasanam, 3 we ondan uly ýaşyndaka edilen maýa goýumlary iň köp netije berýär. Kanadanyň «ThinkSmart» merkeziniň maksatnamalary çagalaryň programma ýazmak, robot gurluşy, matematika we beýleki dersler boýunça başarnyklaryny ösdürmäge gönükdirilendir.
«ThinkSmart» bilim merkezinde okamak çagalara geljekde hünär kesgitlemekde we daşary ýurtlaryň ýokary okuw mekdeplerine okuwa taýýarlyga ep-esli kömek edip biler. Okuwy doly tamamlan okuwçylara Türkmenistanyň we Kanadanyň şahadatnamalary gowşurylar.
«TürkmenGazet».
