Hytaýda täze hünärleriň resmi ykrar edilmegi ýurduň Ynsan resurslary we sosial howpsuzlyk ministrliginiň mahsus beýanatynda mälim edildi.
«Sanawda jemi 19 sany hünär bar. Olaryň köpüsi sanly ykdysadyýet we täze senagat ulgamlaryna degişlidir» diýip, «South China Morning Post» habarlar gullugy ýazýar.
Täze hünärleri ykrar etmek işleri Hytaýda geçen ýylyň ahyrynda başlandy. Muňa garamazdan, olaryň sanawy şu ýylyň 31-nji iýulynda resmi ykrar edildi. Täze hünärleriň hataryna onlaýn-strimer, «akylly» maşynyň sürüjisi, emeli aňy dolandyrmak boýunça hünärmen, medeni işläp çykarmagy meýilleşdiriş we ekspluatatsiýa boýunça hünärmen, «akylly» gurluşlaryň adminstratory, bioinženeriýa boýunça tehnik ýaly hünärler girýär.
Hytaýyň Ynsan resurslary we sosial howpsuzlyk ministrliginiň beýanatynda: «Täze hünärleri döretmek iş orunlary köpeltmekde, hünär tälimini we okatmagy ýola goýmakda, işgärleriň zähmet standartlaryny ýokarlandyrmakda, telekeçiligi ösdürmekde uly ähmiýete eýedir» diýlip bellenilýär.
Mysal hökmünde aýtsak, onlaýn-striming Hytaýda, hakykatdan hem, barha ösýär. Esasanam, dürli hili önümleri janly efirde satmak meşhurlyga eýe bolýar. Bu bolsa zähmet bazaryna uly täsirini ýetirýär.
«TürkmenGazet».
