Ministrler Kabinetiniň Başlygynyň orunbasary B.Atdaýew awgust aýynda “Kids Ekspo: ähli zat çagalar üçin” atly halkara sergi ýarmarkasyny geçirmäge görülýän taýýarlyk barada 26-njy iýulda geçirilen Hökümet mejlisinde hasabat berdi.
Bellenilişi ýaly, sergi ýarmarkasynda ýurdumyzyň we daşary ýurtlaryň öňdebaryjy haryt öndürijileriniň çagalar, okuwçylar, talyplar üçin harytlaryny, ýokary hilli, ekologik taýdan arassa önümleri, okuw esbaplaryny, elektron harytlary hödürlemek göz öňünde tutulýar. Şunuň bilen birlikde, pudakda iş alyp barýan kompaniýalaryň tejribe alyşmagy, çagalar üçin ussatlyk sapaklarynyň, bäsleşikleriň guralmagy, meşhur Modalar öýleriniň çagalar üçin täze lybaslarynyň dabaraly görkezilişini guramak meýilleşdirilýär.
Prezident Serdar Berdimuhamedow hasabaty diňläp, 19-njy awgustda paýtagtymyzda geçiriljek sergi ýarmarkasyna Türkmenistanyň we daşary ýurtlaryň öňdebaryjy haryt öndürijileriniň gatnaşmagyny üpjün etmegiň zerurdygyny belläp, wise-premýere bu halkara sergini guramaçylykly geçirmäge gowy taýýarlyk görmegi tabşyrdy.
«TürkmenGazet».
