Serdar RAHYMOW
Şu ýyl Latwiýanyň Riga we Polşanyň Warşawa şäherlerinde geçirilen dzýudo boýunça halkara ýaryşlarynda 66 kilograma çenli agram derejesinde gazanan kümüş medallary Türkmen döwlet binagärlik-gurluşyk institutynda bilim alýan 20 ýaşly türgenimize olimpiýa ýollanmasyny gazanmaga mümkinçilik berdi. Serdar Rahymow 28-nji iýulda dzýudo boýunça ýaryşlary kabul etjek «Gran-Pale-Efemer» desgasynda medallar ugrunda göreşer.
* * *
Maýsa PARDAÝEWA
Şu ýyl Polşanyň Warşawa şäherinde geçirilen dzýudo boýunça Ýewropanyň açyk çempionatynda 57 kilograma çenli agram derejesinde gazanylan altyn medal we beýleki üstünlikler Türkmen döwlet bedenterbiýe we sport institutynda bilim alýan 19 ýaşly türgenimize Olimpiýa oýunlarynda iň güýçli türgenleriň hatarynda göreşmäge hukuk gazandyrdy. Maýsa Pardaýewa 29-njy iýulda geçiriljek tutluşyklarda güýjüni synar.
* * *
Döwranbek HASANBAÝEW
Şu ýylyň aprelinde Tailand Patyşalygynyň Phuket şäherinde geçirilen Dünýä kubogynda 102 kilograma çenli agram derejesinde ilkinji bäşlige düşen agyr atletikaçymyz Pariž Olimpiadasyna gatnaşmaga hukuk gazandy. Ýaş türgenimiz Döwranbek Hasanbaýew 10-njy awgustda «Pariž Ekspo Port de Wersal» desgasynda dünýäniň iň güýçli agyr atletikaçylarynyň hatarynda medallar ugrunda göreşer.
* * *
Musa JALAÝEW
Suwda ýüzmegiň birnäçe görnüşinde ýurdumyzyň rekordlaryny täzelän 21 ýaşly türgenimiz Parižde 100 metre erkin ýüzmekde suw ýodasyna çykar. Ýagşygeldi Kakaýew adynaky Halkara nebit we gaz uniwersitetinde bilim alýan Musa Jalaýew 30-njy iýulda «Pari-La-Defans» arenasynda guraljak bäsleşiklerde ýaryşar.
* * *
Aýnura PRIMOWA
Suwda ýüzmek boýunça milli we halkara derejeli ýaryşlarda üstünlikli çykyş eden Aýnura Primowa Pariž Olimpiadasyna gatnaşýan iň ýaş türgenleriň biri bolar. 17 ýaşly Aýnura Primowa 29-njy iýulda «Pari-La-Defans» arenasyndaky suw ýodalarynda 100 metr aralyga arkanlygyna ýüzmek boýunça geçiriljek bäsleşiklere goşular.
* * *
Walentina MEREDOWA
100 metr aralyga ylgamak boýunça Türkmenistanyň köp gezek çempiony we rekordçysy Walentina Meredowa milli ýygyndymyzyň iň tejribeli türgenidir. 2008-nji ýylda Pekinde geçirilen tomusky Olimpiýa oýunlarynda ýurdumyza wekilçilik eden 39 ýaşly türgen 2-nji awgustda «Stad de Frans» stadionynda ylgaw ýaryşlaryna gatnaşar.
«TürkmenGazet».
