Halkymyzyň ýüregini diňleseň, şu ýoluň many-mazmunyny düzýän ynsanlar baradaky beýik aýdymlary eşidýärsiň. Olaryň biri-de beýik Pyraga bagyşlanandyr. Her setiriniň «guba düýelik» agramy bolan Magtymguly Pyragynyň şygryýetini iň bir beýik zatlara, gymmatlyklara deňemek bilen bir hatarda, ony «Türkmen kalbynyň aýnasy» diýibem suratlandyrýarlar. Balkar şahyry Kaýsyn Kulyýew ony Elbrus dagyna deňeýär. Kimler akyldaryň şygyrlaryny agzybirlik, päkgöwünlilik, halallyk çakylykçysy diýip atlandyrsa, ýene birleri egsilmeýän derýa, ynsanlary ruhy teşnelikden gandyrýan güzere meňzedýär. Gahryman Arkadagymyz dana şahyryň şygryýetini pähim-paýhas ummanyna deňeýär. Söz ussatlarynyň aýdanlarynyň her biri türkmeniň şygryýet bossany baradaky ajaýyp aýdym bolup kalbymyza ornaýar.
Dagystanyň halk şahyry Resul Gamzatow: «Magtymgulynyň goşgularyny öz dilimize terjime etmek bilen, poeziýa äleminde şeýle ägirt ynsanyň türkmenleriň arasynda bardygyna göz ýetirdim» diýipdir. Bu sözler akyldar şahyryň beýikligini açmak bilen birlikde, şeýle şahyry dünýä beren halka-da hormatyň nyşanydyr. Şeýle pursatda Gahryman Arkadagymyzyň «Pähim-paýhas ummany Magtymguly Pyragy» atly goşgusyndaky:
Baş egip külli türkmeniň eziz jana-janyna,
Müň togap bilen biz barýarys ýanyna.
Barymyzy şärik edýär ägirt şöhrat-şanyna,
Pähim-paýhas ummany Magtymguly Pyragy —
diýen setirler seriňe gelýär. Biziň her birimiz ussadyň adyny dünýä ýaýmakda öz goşandymyzy goşmaga borçludyrys.
Gahryman Arkadagymyzyň Köpetdagyň gerşinde Magtymguly Pyragynyň heýkelini gurdurmagynda uly many bar. Sebäbi, şahyr aýtmyşlaýyn, daglar — ýeriň myhy, ýerdäki iň uly beýiklik. Beýik şahyryň medeni-seýilgäh toplumynyň dagyň eteginde gurulmagy beýikligi has hem beýige galdyrdy. Diýmek, akyldar şahyryň «Baryp mesgen tutam sizi, daglar, heý!» diýip, welilik bilen aýdan sözleri bu gün Gahryman Arkadagymyzyň ylhamynyň gudratyndan hasyl boldy. Türkmen halkynyň Milli Lideriniň beýik pelsepesinden dörän ol heýkel türkmeniň daglar belentligindäki köňlünde Magtymguly Pyragynyň ebedi orun alandygyny beýan edýän baky eserdir. Gahryman Arkadagymyzyň şahyryň şanyna goşgy döretmegi-de iki beýiklik baradaky pelsepäni kalbyňa doldurýar. Bu goşgy beýik şahsyýetiň beýik şahyra iň mynasyp ýüzlenmesi boldy.
Orazmyrat ORAZMYRADOW,
S.A.Nyýazow adyndaky Türkmen oba hojalyk uniwersitetiniň 1-nji ýyl talyby.
