Düýn «Watan» habarlar gepleşiginde habar berlişi ýaly, Ministrler Kabinetiniň nobatdaky mejlisinde berlen hasabatlara laýyklykda ýurdumyzda gurulýan ýaşaýyş jaýlarynyň we döwrebap edara-kärhanalaryň has-da artýandygy bilen baglylykda, liftlere zerurlygyň köpelýändigini göz öňünde tutup, olaryň önümçiligini ýola goýmak hem-de bar bolan liftlerde abatlaýyş-bejeriş işlerini amala aşyrýan bilelikdäki kärhanany döretmegiň maksadalaýykdygy barada aýdyldy.
Bellenilişi ýaly, ministrlik tarapyndan bu ugurda geçirilen işleriň netijesinde, bilelikdäki kärhanany döretmek boýunça teklipler alyndy we häzirki wagtda şol teklipleriň tehniki häsiýetnamalaryna seljeriş işleri geçirilýär. Şunuň bilen baglylykda, döwlet Baştutanymyzyň garamagyna degişli teklip hödürlenildi. Döwlet Baştutanymyz liftleriň önümçiligini ýola goýmak hem-de degişli abatlaýyş-bejeriş işlerini amala aşyrýan ýörite kärhananyň döredilmeginiň möhüm bolup durýandygyny belledi.
