Türkmenistanyň Daşary işler ministrliginiň Halkara gatnaşyklary institutynda 23 – 25-nji maý aralygynda geçirilen «Halkara gatnaşyklary: parahatçylyk dialogynyň medeniýeti» atly halkara bäsleşik üstünlikli jemlendi. Onuň şahsy tapgyrynyň netijelerine görä, gatnaşyjylar 21 altyn, 35 kümüş we 46 bürünç medal gazandylar. Şol sanda türkmen diplomatiýasynyň milli mekdebiniň talyplary 3 altyn we 8 kümüş medala mynasyp boldular. Şeýle-de halkara bäsleşigiň toparlaýyn tapgyrynda 3 topar altyn, 5 topar kümüş we 8 topar bürünç medal gazandy. Ýeri gelende aýtsak, toparlaýyn tapgyrda TDIM-iň Halkara gatnaşyklary institutynyň talyplaryndan düzülen 2 topar altyn medala mynasyp boldy.
Ýeňijileri sylaglamak we ýapylyş dabarasy özboluşly baýramçylyk ýagdaýyny döretdi. Halkara bäsleşigiň şahsy we toparlaýyn tapgyrlarynda ýeňiji bolan talyplara hem-de magistrlere guramaçylar tarapyndan Diplomlar, medallar, gymmatbahaly sowgatlar dabaraly ýagdaýda gowşuryldy. Ýeňijiler şeýle mümkinçilikleri döredýän, halkara ýaşlar hyzmatdaşlygyny ilerletmäge uly üns berýän türkmen halkynyň Milli Lideri Gahryman Arkadagymyza hem-de hormatly Prezidentimize tüýs ýürekden çykýan hoşallyk sözlerini beýan etdiler.
Ýeňijileriň ýürek buýsançlary sungat ussatlarymyzyň ýerine ýetiren aýdym-sazlary bilen utgaşyp, dabara gatnaşanlara ruhubelentlik duýgusyny bagyşlady. Dürli dillerde ýaňlanan aýdym-sazlarda halklaryň arasyndaky dostluk, hoşniýetlilik, parahatçylyk söýüjilik ýörelgeleri öz beýanyny tapdy.
Jahan ŞUKUROWA,
Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň III ýyl talyby.
