18-nji maýda daşary ýurtlaryň Türkmenistandaky diplomatik wekilhanalarynyň ýolbaşçylarynyň gatnaşmagynda «Magtymguly Pyragy» medeni-seýilgäh toplumynda ýadygärlikleri dikeldilen ýazyjy-şahyrlaryň heýkellerine gül goýmak dabarasy geçirildi.
Paýtagtymyzda dabaraly ýagdaýda açylan «Magtymguly Pyragy» medeni-seýilgäh toplumynda daşary ýurtly ýazyjy-şahyrlaryň, akyldarlaryň hem heýkelleriniň oturdylmagy halklaryň arasynda dost-doganlyk köprüleriniň berkidilýändiginiň özboluşly güwäsidir.
Daşary döwletleriň ýurdumyzda işleýän Adatdan daşary we Doly ygtyýarly ilçileri medeni-seýilgäh toplumynda dabaraly ýagdaýda garşylandy. Umumadamzat medeni ösüşiniň genji-hazynasyna goşant goşan söz ägirtleriniň her biriniň deňinde ýurdumyzyň artistleriniň hut şol ýazyjy-şahyrlaryň keşbindäki çykyşlary hem ýaýbaňlandyryldy. Ilçiler adamzat neslini agzybirlige, jebislige, söýgä ündeýän çeper edebiýatyň taryhynda öçmez-ýitmez eserleri bilen tanalýan ýazyjy-şahyrlaryň täze heýkelleriniň öňünde gül çemenlerini goýdular. Görnükli edebi şahsyýetleriň çeper eserleri esasynda sahnalaşdyrylan tomaşalar hem bu ýere gelenlerde uly täsir galdyrdy.
«TürkmenGazet».
