8-nji maýda hormatly Prezidentimiziň gatnaşmagynda Ahal welaýatynyň Bäherden etrabynda döwrebap sement zawodynyň 2-nji tapgyrynyň, şeýle hem Ak bugdaý etrabynyň çäginde suw arassalaýjy desganyň açylyş dabaralary boldy.
«Watan» gazetiniň internet sahypasynda habar berlişi ýaly, Ahal welaýatynyň Bäherden etrabynda kuwwatlylygy ýylda 1 million tonna sement öndürmäge niýetlenen zawodyň 2-nji tapgyrynyň açylyş dabarasyna Türkmenistanyň Mejlisiniň Başlygy, Ministrler Kabinetiniň Başlygynyň orunbasarlary, Ulag we kommunikasiýalar agentliginiň Baş direktory, harby we hukuk goraýjy edaralaryň ýolbaşçylary, daşary ýurtlaryň Türkmenistandaky ilçihanalarynyň we halkara guramalaryň ýolbaşçylarydyr wekilleri, Ahal welaýatynyň häkimi, köpçülikleýin habar beriş serişdeleriniň wekilleri we halk köpçüligi gatnaşdy.
Döwrebap sement zawodynyň gurluşygyna 2020-nji ýylyň tomsunda badalga berildi. Iri senagat desgasynyň gurluşygy Türkmenistanyň Senagat we gurluşyk önümçiligi ministrliginiň buýurmasy esasynda, Senagatçylar we telekeçiler birleşmesiniň agzasy bolan «Beýik bina» hususy kärhanasy tarapyndan amala aşyryldy. Innowasion tehnologiýalaryň ornaşdyrylmagy täze kärhanada sementiň has ýokary hilli görnüşlerini hem öndürmäge mümkinçilik berer.
Açylyş dabarasynda Germaniýa Federatiw Respublikasynyň ugurdaş kompaniýasy tarapyndan Bäherden sement zawodynyň 2-nji tapgyrynda ýerine ýetirilen inženerçilik işleriniň we oturdylan enjamlaryň dünýä standartlaryna laýyk gelýändigini tassyklaýan güwänama gowşuryldy.
«TürkmenGazet».
