Iň gowy bedewi saýlamak dessury türkmenlerde gadymdan gelýän ýörelgedir. Hut şu nukdaýnazardan, Türkmen bedewiniň milli baýramy mynasybetli her ýyl geçirilmegi däbe öwrülen «Ýylyň iň owadan ahalteke bedewi» atly halkara gözellik bäsleşigi örän uly ähmiýetlidir.
27-nji aprelde Arkadag şäherinde geçirilen dabaralaryň çäklerinde «Ýylyň iň owadan ahalteke bedewi» atly halkara gözellik bäsleşiginiň jemleýji tapgyryna deslapky tapgyrlarda saýlanyp alnan iň gowy ahalteke bedewleriniň 10-sy gatnaşdyryldy. Ilkibaşda bedewler tomaşaçylaryň öňünde tebigy görnüşinde görkezildi. Soňra olary iň zehinli ussat zergärleriň taýýarlan toý lybaslarynda syn ediş meýdançasyna çykardylar.
Emin agzalary hem-de tomaşaçylar her bir bedew baradaky maglumatlar — ady, ýaşy, nesil ugry, olaryň eýeleri bilen tanyşdyrylýar. Bäsleşigiň jemleýji tapgyryna çykan bedewleriň ählisi şöhratly nesil ugurlaryna degişli bolup, ol ýa-da beýleki tohum ugruny dowam etdirijilerdir. Şunda behişdi bedewlere sarpa goýýanlaryň köp sanlysy arassa ganly ahalteke bedewlerini ösdürip ýetişdirmekde esasy nesil ugurlarynyň binýadyny goýan şöhratly bedewleriň häzirki nesilleriniň täsin gözelligine baha bermäge mümkinçilik aldylar. Bedewler seýkin gadamy bilen özleriniň daşky keşplerini hem-de alan tälimlerini açyp görkezdiler.
Şeýlelikde, bäsleşigiň jemleri jemlenende, emin agzalarynyň çözgüdi netijesinde, «2024-nji ýylyň iň owadan ahalteke bedewi» diýen ada 2017-nji ýylda doglan, Gadymgala we Dürli diýen atlaryň neslinden bolan, meşhur Fakirpälwanyň ugruna degişli Gadymy atly mele at mynasyp boldy.
Halkara gözellik bäsleşiginiň ýeňijisine hormatly Prezidentimiz Serdar Berdimuhamedowyň baş baýragy — “Toyota Highlander” kysymly awtoulagyň açary, göçme kubok hem-de diplom gowşuryldy.
Ýeňiji bolan bedewiň seýsi gymmat bahaly baýrak we ýelden ýyndam bedewleriň ösdürip ýetişdirilmegine berýän ägirt uly ünsi üçin döwlet Baştutanymyza tüýs ýürekden hoşallyk bildirdi. Ol türkmen atşynaslarynyň geljekde-de bu ugurdaky işleri mynasyp dowam etdirjekdiklerine ynandyryp, hormatly Prezidentimize berk jan saglyk, uzak ömür, alyp barýan il-ýurt bähbitli işlerinde uly üstünlikleri arzuw etdi.
Mälik ORAZMYRADOW,
S.A.Nyýazow adyndaky Türkmen oba hojalyk uniwersitetiniň 2-nji ýyl talyby.
