14-nji aprelde paýtagtymyzdaky «Sport» myhmanhanasynda geçirilen mediaforumda köpçülikleýin habar beriş serişdeleriniň wekilleri hokkeý boýunça halkara ýaryşa taýýarlygyň dowamynda alnyp barlan guramaçylyk işleri bilen giňişleýin tanyşdyryldy. Bu barada «Türkmenistan» gazetinde habar berildi.
Forumyň dowamynda berlen maglumatlaryň käbiri bolsa aýratyn üns bererlikdir:
— ýaryşyň ähli duşuşyklary milli telewideniýäniň «Ýaşlyk» we «Türkmenistan: Sport» teleýaýlymlarynda üç dildäki (türkmen, rus we iňlis dilleri) teswirleme bilen göni ýaýlymda tomaşaçylara ýetiriler;
— halkara ýaryşyň geçirilýän günlerinde daşary döwletleriň bäşisiniň teleýaýlymlarynda ýaryş bilen bagly gepleşikler, reportažlar we wideogörnüşler görkeziler;
— 40 döwlete degişli internet neşirleriniň 100-e golaýy ýaryşyň habarlaryny ulanyjylaryna gyzgyny bilen ýetirmäge taýýarlyk görýär;
— ýaryşlary göni ýaýlymda alyp görkezmek üçin her birinde 7 operator bolan režissýorlar toparynyň ikisi dört sany göçme telewizion stansiýalar arkaly işlärler. Ýaryşy göni ýaýlymda alyp görkezmäge we beýleki gepleşikleri, netijeler boýunça maglumatlary taýýarlamaga 100-e golaý hünärmen gatnaşar;
— halkara ýaryşy dünýä jemgyýetçiligi bilen paýlaşmakda «Большая Азия» (Russiýa Federasiýasy), «Sinhua» (Hytaý Halk Respublikasy) habarlar agentlikleri we «Mir 24» (GDA), «TRT Avaz» (Türkiýe Respublikasy) hem-de «CCTV» teleýaýlymlary ýurdumyzyň esasy hyzmatdaşlary bolarlar. Ähli habar çeşmeleriniň tagallasy bilen, Ýer ýüzüniň 1 milliarddan gowrak adamyna Aşgabatdaky halkara ýaryş baradaky habarlaryň elýeterli edilmegine garaşylýar;
— ozaldan gelýän tejribä eýerilip, duşuşyklary göni ýaýlymda üç dilde teswirlemäge talyp ýaşlar hem çekildi. Bu gezekki ýaryşda Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Döwletmämmet Azady adyndaky Türkmen milli dünýä dilleri institutynyň hem-de Türkmen döwlet bedenterbiýe we sport institutynyň zehinli talyplary teswirleýjilere ýardam berer. Olar bilen «Türkmenistan: Sport» teleýaýlymynyň teswirleýjileri tarapyndan degişli okuwlar geçildi;
— ýurdumyzyň gazet-žurnallarynyň we internet portallarynyň redaksiýalary hem halkara ýaryş bilen bagly dessin habarlary, täsirli suratlary, söhbetdeşlikleri, syn beriş häsiýetli makalalary okyjylaryna ýetirerler.
«TürkmenGazet».
