Arkadag şäheriniň adybir futbol topary şu baharda bir ýaşady. Mundan göni bir ýyl ozal aprel aýynda ilkinji resmi duşuşygyny geçiren täze topar gysga wagtyň içinde üstünliklerden üstünliklere ýol aşdy. Milli çempionatymyzyň mart aýynda badalga berlen täze möwsüminiň ýakynda geçirilen 5-nji tapgyrynyň duşuşygynda bolsa «Arkadag» futbol topary çempionatdaky 100-nji pökgüsini geçirip, ýene bir ajaýyp üstünligi gazanmagy başardy.
Täze üstünligiň has täsin tarapy bolsa toparyň 100 goly bary-ýogy 28 duşuşyga ýerleşdirmegidir. Munuň özi toparyň futbolçylarynyň her duşuşykda 3,5 gezekden hem kän tapawutlanandygyny görkezýär.
Arkadag şäheriniň adybir futbol topary taryhyndaky ilkinji resmi duşuşygyny geçen ýylyň 18-nji aprelinde Türkmenistanyň çempionatynyň 2-nji tapgyrynyň çäginde Marynyň «Merw» topary bilen geçirip, garşydaşyny 2:1 hasabynda ýeňipdi. Şol günden hem toparyň milli çempionatymyzdaky we Türkmenistanyň kubogyndaky ýeňişli menzilleri başlandy. Topar ilkinji resmi duşuşygynyň bir ýyllygyna 13 gün galanda, 5-nji aprelde çempionatdaky 100-nji pökgüsini geçirip, ýyldyrym çaltlygynda ilerleýändigini ýene bir ýola subut etdi.
Nesip bolsa, «Arkadag» futbol topary halkara giňişlikde uly üstünlikleri gazanan «Köpetdag», «Nisa», «Altyn asyr», «Nebitçi» ýaly toparlarymyzyň şöhratly ýoluny dowam etdirip, türkmen we dünýä futbolynyň taryhyna ady altyn harplar bilen ýazyljak topara öwrüler.
Güneş ANNAMYRADOWA,
Berdimuhamet Annaýew adyndaky Arkadag şäher mugallymçylyk orta hünär okuw mekdebiniň talyby.
