Mälim bolşy ýaly, Türkmenistan döwletimizde 15 — 20-nji aprelde hokkeý boýunça halkara ýaryş geçiriler. Güneşli Watanymyzda sportuň buzda oýnalýan görnüşi boýunça halkara ýaryşyň geçirilmegi ýurdumyzyň sport ulgamynda uly öňegidişlikleri gazanýandygyny, şeýle-de hormatly Prezidentimiziň parasatly baştutanlygynda sporta aýratyn ähmiýet berilýändigini subut edýär.
Türkmenistanyň Bedenterbiýe we sport baradaky döwlet komitetiniň maglumatlaryna görä, bu halkara ýaryşda ýurdumyza Türkmenistanyň Içeri işler ministrliginiň «Galkan» topary wekilçilik eder. Milli ýygyndymyzyň agramly bölegini düzýän bu topar birnäçe gezek Türkmenistanyň çempiony boldy. Belläp geçsek, «Galkan» bilen bir hatarda halkara ýaryşyň çempionlygy we öňdäki orunlary üçin Bahreýn Patyşalygynyň «Bahreýn», Gazagystanyň «Akmola», Türkiýäniň «Gümüş Patenler», Gyrgyz Respublikasynyň «Dordoý», Russiýa Federasiýasynyň Tatarystan Respublikasynyň «Orhiz-Kazan», Oman Soltanlygynyň «Oman Khanjars», Eýranyň «Ice Box», Özbegistanyň «Feniks» we Belarusuň «Wolat» toparlary ýaryşar. 15-nji apreldäki «Feniks» — «Oman Khanjars» duşuşygy we açylyş dabarasy bilen başlanjak halkara ýaryş 20-nji aprelde geçiriljek jemleýji duşuşyklar bilen tamamlanar.
Hususan-da, halkara ýaryşyň duşuşyklary paýtagtymyzdaky Gyşky oýunlar sport toplumynda, türgenleşikler bolsa «Milli Olimpiýa sport köşgünde» we «Galkan» gyş sport merkezinde geçiriler. Şu jähetden, häzirki wagtda Türkmenistan döwletimiz iri halkara ýaryşyň bosagasynda durmak bilen, oňa ykjam taýýarlyk görülýär. Guramaçylyk topary tarapyndan ýaryşyň öňüsyrasynda we onuň dowamynda paýtagtymyz Aşgabada hem-de Arkadag şäherine gezelençleriň birnäçesini guramak meýilleşdirilýär.
Bir söz bilen aýdanyňda, hormatly Prezidentimiziň ýadawsyz aladasy netijesinde, ýurdumyzda sport boýunça halkara hyzmatdaşlygy ösdürmek babatda amala aşyrylýan işler döwletimiziň hem-de öňde goýlan wezipeleri çözmekde saglygyň we sportuň gymmatlygyna aýdyň, anyk düşünýän jemgyýetimiziň tagallalarynyň sazlaşykly utgaşmagynyň ajaýyp mysalydyr.
Gyzylgül PALTAÝEWA,
S.A.Nyýazow adyndaky Türkmen oba hojalyk uniwersitetiniň uly mugallymy.
