Meşhur sport neşirleriniň biri hasaplanylýan «Sportico» neşiri taryhda iň köp girdeji gazanan türgenleriň täzelenen reýting sanawyny hödürledi.
Sanawda inflýasiýa göz öňünde tutulyp, türgeniň karýerasynyň dowamyndaky we ony tamamlandan soňky zähmet haklary, bonuslary, baýrak haklary, sport bilen baglanyşykly işlerden gazanan girdejileri göz öňünde tutuldy.
Reýting sanawynda Milli basketbol assosiasiýasynyň (MBA) alty gezek çempiony bolan Maýkl Jordan 3,75 milliard dollar gazanjy bilen ilkinji orny eýelemegi başardy. Sanawda ikinji orunda 2,66 milliard dollar bilen golfçy Taýger Wuds, üçünji orny bolsa 1,92 milliard dollar girdeji bilen Kristiano Ronaldo eýeleýär. Bulardan başga-da, sanawda golfçy Arnold Palmer, basketbolçy Lebron Jeýms, golfçy Jek Niklaus, futbolçy Lionel Messi hem-de Dewid Bekhem, tennisçi Rojer Federer, boksçy Floýd Meýwezer ýaly meşhur türgenler ýer alýar.
Bakyguly ORAZOW,
Türkmenistanyň DIM-niň Halkara gatnaşyklary institutynyň Halkara žurnalistikasy fakultetiniň 1-nji ýyl talyby.
