2024-nji ýylyň 4-nji aprelinde Magtymguly adyndaky milli sazly drama teatrynda Magtymguly Pyragynyň doglan gününiň 300 ýyllygy mynasybetli Türkmenistanyň sungatda at gazanan işgäri, Ýaşlar baýragynyň eýesi, tanymal kompozitor Suhan Tüýliýewiň eserlerinden düzülen simfoniki orkestriniň konserti geçirildi.
Bu konsertde Türkmenistanyň sungatda at gazanan işgäri Ýelena Moskwiçowanyň ýolbaşçylyk etmeginde Türkmen milli konserwatoriýasynyň hor topary, Eziz Jumanyýazowyň ýolbaşçylyk etmeginde simfoniki orkestri, Türkmenistanyň halk artisti Atageldi Garýagdyýew, Röwşen Baýramow, Begdurdy Çerkezow özleriniň ajaýyp çykyşlary bilen dabara şowhun paýladylar.
Konsert Türkmen milli konserwatoriýasynyň simfoniki orkestriniň ýerine ýetirmeginde «Pendi nagmalary» atly eseri bilen açyldy. Dabarada Türkmenistanyň halk artisti Atageldi Garýagdyýewiň aýtmagynda Gündogaryň beýik akyldar şahyry Magtymguly Pyragynyň goşgularyna düzülen «Ili gözlär», «Neýleý, indi biçäreýem», «Ýeldim tut» aýdymlary, simfoniki orkestriniň ýerine ýetirmeginde «Pendi nagmalary» üç bölümi, «Uzuklar» sazly rowaýatyndan «Näzigiň lälesi», wiolonçel hem orkestr üçin «Gözelim» atly eserler ussatlyk bilen ýerine ýetirildi.
Konsert tomaşaçylaryň yzygiderli el çarpyşmalary bilen dowam etdi. Dabaranyň jemleýji eseri solistler Röwşen Baýramowyň, Begdurdy Çerkezowyň hem-de konserwatoriýanyň hor toparynyň ýerine ýetirmeginde «Türkmen binasy» aýdymy ýaňlandy. Şowhunly konsertiň ahyrynda tomaşaçylar güler ýüz bilen Suhan Tüýliýewe gül sowgatlaryny gowşuryp, özleriniň minnetdarlygyny bildirip, kompozitora janynyň sag bolmagyny, döredijilik ýolunda üstünlikleriň ýar bolmagyny arzuw edip, ýadygärlik surata düşdüler.
Türkmen kompozitorlyk mekdebiniň güýçli wekilleriniň biri Suhan Tüýliýew häzirki wagtda Maýa Kulyýewa adyndaky Türkmen milli konserwatoriýasynda ýaş kompozitorlara, sazandalara sapak berýär, olaryň öz hünärleriniň ussady bolmagyna, kemala gelmegine ýardam edýär.
Ogulnur SULTANOWA,
Maýa Kulyýewa adyndaky Türkmen milli konserwatoriýasynyň «Sazşynaslyk» hünäriniň 2-nji ýyl talyby.
