Häzirki wagtda sanly ulgamyň mümkinçilikleri barha giňeýär. «Tehnologiýalar eýýamy» diýlip atlandyrylan döwür öz miweleri bolan tehniki enjamlaryň gündelik durmuşymyza ykjam ornaşmagy bilen tapawutlanýar. Häzirki wagtda sanly ulgam dünýä ýurtlarynyň ähli pudaklarynyň aýrylmaz bölegine öwrüldi. Bu ýagdaý sport ulgamy babatynda-da şeýledir.
Kompýuteriň we tehniki enjamlaryň işi ep-esli derejede ýeňilleşdirip, gündelik hereketi azaldýandygyna garamazdan, sanly ulgam adyny tutanyňda diňe hereket göz öňüňe gelýän sport ulgamyny hem öz içine aldy. Häzirki wagtda sportuň bu görnüşi:
kibersport;
elektron sport;
esport;
kompýuter sporty
ýaly atlar bilen hem tanalýar. Maglumatlara görä, sportuň bu görnüşi ilki Amerikanyň Kaliforniýa ştatynda ýüze çykýar. Bu sport wagtyň geçmegi bilen dünýäniň beýleki ýurtlaryna hem giňden ýaýrap, uly meşhurlyga eýe bolýar. Häzirki wagtda kibersport sportuň iň uly isleg bildirilýän görnüşleriniň biri bolup, ol resmi taýdan sportuň bir görnüşi hökmünde kabul edilendir.
Elektron sportyň bu görnüşinde ýaş, jyns, fiziki işjeňlilik çäklendirilmeýär. Geçirilýän bäsleşikler wirtual dünýäde kompýuterleriň we oýun enjamlarynyň üsti bilen amala aşyrylýar. Bäsleşige gatnaşýan oýunçylardan edilýän esasy talap bolsa olaryň çakganlygy, ünslüligi hem-de maksada okgunlylygydyr. Ýatlap geçsek, 2019-njy ýylyň dekabrynda döredilen Global kiber sport federasiýasynyň düzümine Türkmenistanyň Elektron sport federasiýasynyň girizilmegi bilen ýurdumyzda sportuň bu görnüşine bolan üns has-da ýokarlandy.
Amangeldi ARAZKULYÝEW,
Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň talyby.
