Fransiýanyň Prezidenti Emmanýuel Makron «L’Equipe» sport gazetine beren interwýusynda 2024-nji ýylda Parižde geçiriljek tomusky Olimpiýa oýunlarynyň açylyş dabarasynyň Sena derýasynyň kenarynda, şeýle hem derýanyň özünde guraljakdygyny aýtdy. Fransuz Lideri: «Biz bu açylyş dabarasynyň ýatdan çykmajak waka öwrülmegini isleýäris» diýdi.
Mälim bolşy ýaly, üstümizdäki ýylda Fransiýanyň Pariž şäherinde geçiriljek ХХХIII tomusky Olimpiýa we ХVII tomusky Paralimpiýa oýunlary öňümizdäki iri halkara sport ýaryşlarydyr. Olara türkmen türgenleri hem gatnaşmaga hukuk gazandylar we häzirki wagtda sportuň 9 görnüşi boýunça Türkmenistanyň milli ýygyndy toparlarynyň türgenlerini taýýarlamak işleri depginli alnyp barylýar.
Olimpiýa oýunlaryna taýýarlyk görýän türgenlerimiz GDA döwletlerinde, Türkiýede, Polşada, Litwada, Kuweýtde, Birleşen Arap Emirliklerinde, Gruziýada, Bosniýa we Gersogowinada, Ýaponiýada geçirilen halkara okuw-türgenleşik ýygnanyşyklaryna gatnaşyp, tejribelerini has-da artdyrdylar. Bularyň ählisi ýurdumyzyň adamlary umumadamzat gymmatlyklarynyň daşyna jebisleşdirmäge, dünýäde parahatçylygy, halklaryň we ýurtlaryň arasynda dostlukly gatnaşyklary pugtalandyrmaga ýardam berýän sport diplomatiýasynyň barha ilerledilýändiginiň, bu ugurda döwlet tarapyndan uly aladalaryň edilýändiginiň aýdyň güwäsidir.
Bu oýunlar tomusky Olimpiýa oýunlarynyň taryhda indi üçünji gezek Fransiýanyň paýtagtynda geçiriler. Öňki Pariž Olimpiadasy 1900 we 1924-nji ýyllarda geçirilipdi. 2024-nji ýylda sport oýunlarynyň 26-njy iýuldan 11-nji awgust aralygynda geçirilmegi meýilleşdirilýär. Oňa 10,5 müň sportsmeniň gatnaşmagyna garaşylýar.
Eziz EMINOW,
TDIM-niň Halkara gatnaşyklary institutynyň Halkara žurnalistikasy fakultetiniň 3-nji ýyl talyby.
