Magtymguly Pyragy portalynyň döredilmegi ýurdumyzda sanly ulgamyň mümkinçilikleriniň, şeýle hem şahyryň doglan gününiň 300 ýyllygy mynasybetli ähmiýetli işleriň giň gerim alýandygynyň aýdyň subutnamasydyr.
Bu portal Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň alymlary, ylmy işgärleri tarapyndan geçen ýylyň sentýabr aýynda döredilip, häzirki wagtda magtymgulyşynaslaryň, görnükli alymlaryň, doktorantlaryň, aspirantlaryň şahyryň ömri we döredijiligi baradaky ylmy maglumatlary, dürli döwürlerde çap edilen neşirler, audio we wideo ýazgylar bilen üsti yzygiderli doldurylýar. Dünýä halklarynyň beýik şahyryň döredijiligi bilen tanyşmagy üçin maglumatlary türkmen, iňlis we rus dillerinde okamak mümkinçiligi bar. Şeýle hem onda şahyryň arap, ispan, azerbaýjan dillerine terjime edilen goşgulary ýerleşdirilipdir.
Magtymguly Pyragy portalyna girmek üçin internet ulgamyna birikdirilen kompýuterleriň ýa-da el telefonlarynyň salgy ýazylýan bölegine magtymgulypyragy.gov.tm diýip, elektron saýtyň salgysyny ýazmaly. Portalyň baş sahypasynda Gahryman Arkadagymyzyň Magtymguly Pyragy hakyndaky aýdan parasatly jümleleri berlipdir. Milli Liderimiziň «Magtymguly Pyragy türkmen halkynyň taryhynyň iň çylşyrymly döwründe ýaşan, agzybirlik, garaşsyzlyk, özbaşdak döwlet gurmak ýaly beýik maksatlara öz döredijiligi bilen gulluk eden ynsanperwer şahyrdyr» diýen parasatly sözleri beýik şahyryň şahsyýetine we işine berlen ýokary bahadyr.
Magtymguly Pyragy portaly döwri, ömri, milli garaýyşlary, goşgulary, ebedileşdirilişi, öwrenilişi, neşirler, çäreler ýaly birnäçe bölümlerden ybarat. Bu bölümleriň hersi öz atlandyrylyşy boýunça şahyr hakynda gymmatly maglumatlary özünde jemleýär.
Enegyz NURMUHAMMEDOWA,
Türkmenistanyň Oguz han adyndaky Inžener-tehnologiýalar uniwersitetiniň talyby.
