Ýakynda Mary şäherindäki 50-nji çagalar bakja-bagynda mekdebe çenli bilim we terbiýe işinde möhüm ähmiýetli temalaryň birine bagyşlanyp usuly sagat geçirildi. Usuly-guramaçylyk ugurly bu çäre Mary welaýat Baş bilim müdirligi tarapyndan guraldy.
Usuly sagadyň temasy «Mekdebe çenli çagalar edaralarynyň maşgala bilen bilelikdäki işleriniň netijesinde çagalaryň irki ýaşdan başlap hemmetaraplaýyn sazlaşykly ösüşini üpjün etmekde we ony mekdebe taýýarlamakda maşgala usuly ýardam bermek, şeýle-de bu babatda ata-eneleriň endiklerini kämilleşdirmegiň ýollary» diýlip atlandyryldy. Usuly ähmiýetli bu çäre çagalar bakja-bagynyň aýdym-sazly çykyşlary bilen badalga aldy. Bu ýerde usuly sagada gatnaşýan Mary şäheriniň mekdebe çenli bilim we terbiýe düzümleriniň hünärmenleri, öňdebaryjy bilim işgärleri, terbiýeçiler çagalar bakja-bagynyň bilim işgärleriniň we körpeleriniň öz döredijiligi bilen taýýarlan okuw görkezme we paýlama esbaplarynyň, dürli şekilleriň sergisi bilen tanyşdylar. Şeýle-de I uly (mekdebe taýýarlaýyş) toparda terbiýeçi G.Mollaberdiýewanyň «Maşgala» atly göwnaçma çäresini geçirişine, terbiýeçi-usulyýetçi M.Atdaýewanyň toparlarda ata-eneler ýygnaklarynyň adaty däl usullarda guraýyşynyň pursatlaryna syn etdiler.
Usuly sagadyň barşynda bolsa degişli tema esasynda öňdebaryjy iş tejribeden baý mazmunly çykyşlar diňlenildi. Şeýle-de ussat bilim işgärleriniň «Mekdebe çenli çagalar edaralarynyň maşgala bilen bilelikdäki işleriniň netijesinde çagalaryň irki ýaşdan başlap hemmetaraplaýyn sazlaşykly ösüşini üpjün etmekde we ony mekdebe taýýarlamakda maşgala usuly ýardam bermek, şeýle-de bu babatda ata-eneleriň endiklerini kämilleşdirmegiň ýollary», «Toparlarda ata-eneler ýygnaklarynyň adaty däl usullarda geçirilişi» diýen temalarda eden çykyşlary has täsirliligi bilen tapawutlandy. Çykyşlarda çagalar baglary bilen maşgalanyň arasyndaky alnyp barylýan işleriň guralyşy, onuň ýörelgeleri, kämil nesilleri ýetişdirmekde ata-eneleriň öňünde durýan wezipeler barada giňişleýin bellenildi. Bu babatda terbiýeçiler üçin netijeli usullar beýan edildi.
Usuly sagat Berkarar döwletiň täze eýýamynyň Galkynyşy döwründe ýaş nesliň kadaly irki ösüşi we talabalaýyk mekdebe taýýarlygy, bagtyýar maşgalalarda kemala gelýän perzentleriň hemmetaraplaýyn sazlaşykly kemala gelmegi, birleşen tagallalar esasynda kämil ýaşlaryň ösdürilip ýetişdirilmegi, okuw-terbiýeçilik, usulyýet-guramaçylyk işleriniň döwrebaplaşdyrylmagy ugrunda ähli mümkinçilikleri we şertleri döredip berýän Gahryman Arkadagymyzyň hem-de Arkadagly Gahryman Serdarymyzyň adyna arzyly alkyşlaryň aýdylmagy bilen jemlendi.
Ogulmaral BAÝAKOWA,
Mary şäherindäki 50-nji çagalar bakja-bagynyň müdiri, TDP-niň ilkinji guramasynyň başlygy.
