Demirgazyk Amerikanyň Esasy futbol ligasynyň (MLS) «Inter Maýami» toparynyň hüjümçisi Lionel Messi Argentinada ýylyň türgeni diýlip ykrar edildi.
Messi dördünji gezek bu baýraga mynasyp boldy. Ýagny, geçen 2023-nji ýylda Messi «PSŽ» toparynyň düzüminde Fransiýanyň çempiony bolup, tomusda «Inter Maýami» bilen şertnama baglaşypdy. Täze kluby bilen Messi ähli ýaryşlarda 14 oýun oýnady, şol oýunlarda 11 topy geçirdi. Argentinaly futbolçy toparyna taryhyndaky ilkinji kubogyny – MLS-iň we Meksikanyň çempionatynyň toparlarynyň arasynda geçirilýän Ligalaryň kubogyny almaga kömek etdi.
Geçen ýylyň zenan türgeni hökmünde bolsa 3000 metr aralyga päsgelçilikli ylgawçy Belen Kasetta saýlandy. Ol 2023-nji ýyldaky Panamerika oýunlarynda 9 minut 39,47 sekunt netije görkezip, Günorta Amerikanyň rekordyny goýdy.
«TürkmenGazet».
