Ählimiziň bilýän belli amerikan žurnalistimiz, filosof, psiholog Napoleon Hill meşhur adamlaryň terjimehalyny öwrenmäge ömrüniň 20 ýylyny sarp edipdir.
Amerikan mediamagnaty Robert Edward Terner ýelkenli gämiler bilen suwda ýüzmegi, hatda şol görnüş boýunça geçirilýän ýaryşlara gatnaşmagy halaýan ekeni. Sportuň bu görnüşi oňa hatarly ýagdaý ýüze çykanda ýa-da kynçylykly pursatda bada-bat pikiriňi jemlemegi we dogry netije çykarmagy öwredipdir.
Dünýä belli «Cox Enterprises» mediýa kompaniýasyny esaslandyryjy Jeýms Midlton Koksuň nebereleri 20-ä golaý telestansiýalara, 100-e golaý radioýaýlymlara eýeçilik edýär.
Dünýädäki iň meşhur aýal žurnalist hem-de ilkinji milliarder zenan Opra Keil Uinfriniň hakyky ady Orpa bolupdyr. Bu at oňa gadymy kitaplardaky gahrymanyň hormatyna goýlupdyr, ýöne hemmeler onuň adynyň harplarynyň ýerini çalşyryp, Opra diýip tutýarlar. Soňlugy bilen bütin dünýä Uinfriniň Opra adyny ykrar edýär.
ABŞ-nyň žurnalistikasynyň taryhynda mediamagnatlaryň hatarynda tanalýan ussat žurnalist, syýahatçy, neşirýatçy, reportýor Uilýam Rendolf Herstiň eýeçiliginde 1940-njy ýyllarda 25 sany gündelik, 24 sany hepdelik neşir, 12 sany radiostansiýa, 2 sany habarlar gullugy, 1 sany kinostudiýasy bolupdyr. 1948-nji ýylda ol «BWAL-TV» telestudiýasyny satyn alypdyr. Gazetler gündelik 13 million nusga bilen 40 million okyjyny ýygnapdyr.
Žurnalistikada «Sary metbugaty» esaslandyryjy tanymal žurnalist, mediamagnat Žozef Pulitseriň adyna döredilen Pulitser adyndaky baýrak 1917-nji ýyldan berlip başlanýar. Onda her gezek 25 adam ýeňiji diýlip yglan edilýär.
Häzirki wagtda köp adamlaryň, aýratynam, ýaşlaryň durmuş şygaryna öwrülen «Eger-de şowsuzlyga uçraryn diýip gorkýan bolsaňyz, eliňizi gowşuryp oturyberiň, şonda ol siziň duşuňyzdan geçip gider» diýlen jümle meşhur žurnalist Ted Ternere degişlidir.
Pena ÝUSUPOW,
Türkmenistanyň Daşary işler ministrliginiň Halkara gatnaşyklary institutynyň talyby.
