Tamamlanyp barýan 2023-nji ýylyň jemi boýunça iň köp girdeji gazanan zenan türgen polşaly tennisçi Iga Swýontek boldy. Reýting dünýäniň meşhur «Forbes» žurnaly tarapyndan düzülen.
Türgeniň girdejisi salgytlardan we agent töleglerinden öň 23,9 million dollar bolup, olardan 9,9 million dollary ýaryşlardaky baýrakly orunlary üçin alypdyr. Galan 14 milliony bolsa Swýontek hemaýatkärlik şertnamalary arkaly gazanandyr. Reýting sanawynda ikinji orunda 22,1 million dollar gazanan hytaýly fristaýlçy Eýlin Gu eýelemegi başardy. Türgeniň baýragy umumy mukdardan 100 müň dollara barabar, galan girdeji mahabat şertnamalarynyň paýyna düşýär.
Üçünji orny 21,7 million dollar bilen amerikaly tennisçi Kori Gauff jemläp, şolardan 6,7 million dollary baýrak hökmünde alyp, 15 million dollar hemaýatkärlik şertnamalaryndan gazanypdyr.
Şeýle-de, iň köp girdeji gazanan zenan türgenleriň sanawynda Emma Radukany, Naomi Osaka, Arina Sobolenko, Jessika Pegula, Winus Uilýams, Ýelena Rybakina, Leýla Fernandes ýaly meşhur türgenler ýerlerini alýar.
Maýsa DURDYMYRADOWA,
S.A.Nyýazow adyndaky TOHU-nyň Türkmenabat agrosenagat orta hünär okuw mekdebiniň 116-njy toparynyň talyby.
