Amerikan kinosungat akademiýasy 10 sany kategoriýada «Oskar» baýragyna dalaşgärleriň gysga sanawyny hödürledi. Dalaşgärleriň sanawy akademiýanyň web saýtynda hem ýerleşdirilendir.
«Iň gowy daşary ýurt çeper filmi» nominasiýasynda 15 film dalaşgär görkezilip, şolaryň hatarynda germaniýaly režissýor Wim Wendersiň «Perfect days», meksikaly režissýor Lila Awilesiň «Totem» filmi we beýlekiler ýer alýar.
«Iň gowy aýdym-saz» kategoriýasynda baýrak üçin beýlekiler bilen bir hatarda «Barbie» hem-de «Oppenheimer» ýaly filmler dalaş edýär.
«Iň gowy dokumental film» nominasiýasynda görkezilen dalaşgärleriň arasynda ABŞ-dan režissýor Mettýu Heýnemanyň «Amerikan simfoniýasy», amerikaly Madlen Gewiniň «Beyond Utopia», çilili Meýti Alberdiniň «Ebedi hatyra» filmi bar.
Abraýly kino baýragy üçin dalaşgärler «Iň gowy gysga metražly dokumental film», «Iň gowy grim we saç bezegi», «Iň gowy aýdym», «Iň gowy gysga metražly multfilm», «Iň gowy çeper gysga metražly film», «Iň gowy ses», «Iň gowy wizual effektler» kategoriýalarynda görkezildi.
Ýatlap geçsek, Amerikan kinosungat akademiýasynyň metbugat gullugy «Oskar» baýragynyň 96-njy gowşurylyş dabarasynyň 2024-nji ýylyň 10-njy martynda geçiriljekdigini hatda onuň alypbaryjysynyň Jimmi Kimmel boljakdygy barada habar beripdi.
Kemal ORAZOW,
Döwletmämmet Azady adyndaky Türkmen milli dünýä dilleri institutynyň Gündogar dilleri we edebiýaty fakultetiniň türk dili hünäriniň 5-nji ýyl talyby.
