Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda bagtyýar halkymyz şan-şöhrata beslenen ýyly arka atyp, ýagşy umyt-arzuwlar bilen Täze — 2024-nji ýyla uly joşgun bilen öňe barýar. 2023-nji ýyl — Arkadag Serdarly bagtyýar ýaşlar ýyly hemmämize mälim bolşy ýaly, uly üstünliklere, rowaçlyklara, şanly wakalara baý ýyllaryň biri boldy.
Döwür bagtyýar, döwlet berkarar bolanda ruhubelentlik bilen garşy alynýan ýyllar hem düşümli, rysgal-bereketli, şanly gelýär. Şunda Täze ýyl baýramçylygy maşgala baýramçylygy hökmünde has meşhurdyr. Täze ýyl baýramçylygynda her maşgalada mukaddes saçaklar bezelip, maşgala agzalary jem bolýar. Ykballara nur çaýýan, dünýäde şatlyk-şowhun bilen garşylanylýan bu baýram hemmäniň köňlünde buýsanç, şatlyk duýgularyny döredýär. Şu günler ýurdumyzyň söwda merkezlerinde baýramçylyk söwdasy hem gyzgalaňly dowam edýär. Ýurdumyzda öndürilen önümler, şol sanda ter gök we miwe önümleri, balyk, et, çörek önümleri, başga-da gündelik durmuşymyzda gerek bolan ähli önümler halkymyza elýeterli bahadan hödürlenýär.
Tamamlanyp barýan 2023-nji ýylda ykdysadyýet, ylym, bilim, saglygy goraýyş we durmuş üpjünçiligi, oba hojalygy, ýangyç-energetika, ulag, aragatnaşyk, telekommunikasiýalar, gurluşyk, medeniýet, sungat ulgamlarynda belent sepgitlere ýetildi. Türkmenistan özüniň halkara abraýyny has-da belende galdyryp, dünýä derejesinde oňyn başlangyçlary öňe sürýän parahatçylyk dörediji döwlet, halkara hyzmatdaşlygyň merkezi hökmündäki ornuny pugtalandyrdy.
Täze ýyl baýramçylygy bilen Gahryman Arkadagymyzy, Arkadagly Gahryman Serdarymyzy, mähriban halkymyzy tüýs ýürekden gutlaýarys!
Bahar ORAZOWA,
S.A.Nyýazow adyndaky Türkmen oba hojalyk uniwersitetiniň mugallymy.
