Häzirki wagtda gündogaryň beýik akyldar şahyry bolan Magtymguly Pyragynyň doglan gününiň 300 ýyllygyny bellemek boýunça çäreleriň meýilnamasynyň çäklerinde «Magtymguly Pyragy portaly» işe girizildi. Portaly döretmäge hem-de onuň many-mazmunly çykmagyna jogap berýän Magtymguly adyndaky Dil, edebiýat we milli golýazmalar institutynyň, portalyň serweriniň programma üpjünçiligine we kiber goragyna jogap berýän Tehnologiýalar merkeziniň hem-de dil goldawyny berýän ýokary okuw mekdepleriniň hünärmenleri gatnaşdy.
Döwrebap sanly tehnologiýalary ulanmak arkaly döredilen täze maglumat çeşmesi dünýä edebiýatynyň altyn hazynasynyň bir bölegi bolan Magtymgulynyň baý edebi mirasyny bütin dünýä hödürleýär, dünýäniň islendik künjegindäki internet ulanyjysyna türkmen halkynyň ruhy aýratynlyklaryna, ahlak gymmatlyklaryna we durmuş ýörelgelerine uly täsir eden şahyryň ruhy dünýäni we pelsepewi garaýyşlaryny açmaga mümkinçilik berýär. Portal bölümlere ýerleşdirilen giňişleýin maglumatlary öz içine alýar: şahyryň ýaşan we döreden döwri, akyldaryň terjimehaly we dünýägaraýşy, goşgulary, ebedileşdirilmegi, onuň döredijiligini öwrenmek, Magtymguly Pyraga bagyşlanan kitaplar we wakalar.
Şeýle-de ulanyjylara web portalyň administratoryna maglumat iberip biler ýaly mümkinçilik döredildi. Magtymguly Pyragynyň eserini öwrenýän talyplaryň öz-özüni barlamagy üçin portalda XVIII asyrda ýaşap-döredip geçen şahyryň häzirki zaman düşündirişini talap edýän goşgularynyň sözlerine esaslanylyp düzülen elektron krossword hem ýerleşdirilendir.
Geljek 2024-nji ýylda Magtymguly Pyragynyň 300 ýyllygynyň belleniljek senesine çenli galan wagty hasaplaýjy taýmeriň bardygyny bellemek gerek.
Ogulşat GURBANGELDIÝEWA,
Berdimuhamet Annaýew adyndaky Arkadag şäher mugallymçylyk orta hünär okuw mekdebinin 1-nji ýyl talyby.
