Halkara futbol federasiýasy (FIFA) resmi saýtynda 30-njy noýabrda milli ýygyndy toparlaryň täzelenen sanawynda Türkmenistanyň milli ýygyndysy 141-nji orny eýeledi diýip, «sports.ru» saýty habar berýär.
Milli ýygyndymyz 1078 utuk toplap, Filippinleriň hem-de Antigua we Barbudanyň arasynda ýerleşýär. Futbol toparlarynyň sanawynda Belgiýa, Braziliýa we Fransiýa öňdeligi eýeleýär.
Maglumat hökmünde belläp geçsek, Türkmenistanyň Futbol federasiýasy 1992-nji ýylda döredildi. Şol ýylda hem Türkmenistanyň milli ýokary ligasynyň oýunlary, Türkmenistanyň Kubogy ugrunda ýaryşlar geçirilip başlandy. 1994-nji ýylda Türkmenistanyň Futbol federasiýasy FIFA-nyň we Aziýa futbol konfederasiýasynyň agzalygyna kabul edildi. 1994-nji ýylda futbol boýunça Türkmenistanyň milli ýygyndy topary Aziýa oýunlarynyň çärýek finalyna çykdy hem-de ýygyndy toparymyz 1995-nji ýyldan bäri futbol boýunça her ýyl geçirilýän halkara ýaryşlara gatnaşýar.
Parahat HEKIMOW,
TOHI-niň Weterinar lukmançylygy fakultetiniň Maglumat ulgamlary we tehnologiýalary taýýarlyk ugrunyň 2-nji ýyl talyby.
