Golaýda Belarus Respublikasynda ýurduň iň uly kino forumy — «Listapad» Minsk halkara kinofestiwaly geçirildi. Indi 29-njy gezek guralan bu özboluşly döredijilik çäresi bir hepdäniň dowamynda diňe bir ýurduň paýtagtynda däl-de, beýleki şäherlerinde-de ýaýbaňlandyryldy. Şu ýyl kinofestiwala jemi 107 döwletden 2087 sany çeper film hödürlenildi. Türkmenistanly kinorežissýor Sahysalyh Baýramowyň «Daragt» atly filmi hem festiwalyň bäsleşik maksatnamasynyň çäginde tomaşaçylara görkezildi.
24-nji noýabrda halkara kinofestiwalyň ýapylyşy hem-de ýeňijileri sylaglamak dabarasy geçirildi. Onuň dowamynda GDA-nyň Ýerine ýetiriji komitetiniň «Serhetsiz kino» atly ýörite baýragynyň eýesi kesgitlenildi. Dabarada birbada iki sany film — «Daragt» atly türkmen we «Ewolýusiýa» atly özbek filmi sylaglanyldy. Halklaryň arasyndaky dostlugy berkitmek hem-de medeni hyzmatdaşlygy ösdürmek boýunça ýörite baýraklary GDA-nyň Baş sekretarynyň birinji orunbasary Leonid Anfimow gowşurdy.
«TürkmenGazet».
