«Gazeta.ru» -nyň habar bermegine görä, Microsoft «Wonka» filminiň çykmagyna bagyşlanan şokoladdan ýasalan özboluşly «Xbox Series X» oýun konsoly toplumyny hödürledi.
Meşhur «Wonka» filminiň 15-nji dekabrda çykmagyna garaşylýar. Ol 1971-nji ýylda çykarylan «Willy Wonka we şokolad fabrigi» filminiň prikweli bolar. Maglumatlara görä, baş keşbi Timoti Şalame janlandyrar.
Aksiýanyň çäklerinde Microsoft süýjülikleri we wideo oýunlaryny halaýanlara özboluşly sowgat toplumyny utmak mümkinçiligini berer. Toplum şokolad plitkasy şekilinde dizaýn edilen «Xbox Series X» oýun konsolyny, biri şokoladdan ýasalan we hakyky bolmadyk üç sany oýun dolandyryş enjamyny, konditer dükanynyň tekjesi hökmünde şekillendirilen diregi, bäş sany şokolad trýufeli we üç aýlyk «Xbox Game Pass Ultimate» agzalygyny öz içine alýar.
Ýekeje nusgada çykarylan kolleksion toplum «X» sosial ulgamynda bije çekişlik arkaly sowgat berler. Bu bije çekişlige gatnaşmak üçin «Xbox-yň» resmi hasabyna ýazylmaly we ýazgyny paýlaşmak ýeterlikdir.
Ýeňijiler şu ýylyň 25-nji dekabrynda täze ýylyň öňüsyrasynda yglan ediler. Bäsleşige «Xbox» bölüminiň resmi taýdan hereket edýän ýurtlaryndan ulanyjylar gatnaşyp bilerler.
Aýmyrat ÝUSUPOW,
Türkmenistanyň Daşary işler ministrliginiň Halkara gatnaşyklary institutynyň talyby.
