23-nji noýabrda Aşgabatda iri sport baýramçylygy — Kuraş boýunça dünýä çempionaty başlanar. Ýaryşa türkmen türgenleri ýokary derejedäki taýýarlyk bilen geldiler.
Taryhy 1999-njy ýyldan başlanýan Kuraş boýunça dünýä çempionatynyň abraýy barha artýar. Taryhy maglumatlara görä, Gadymy Gresiýada geçirilen Olimpiýa oýunlarynda hem kuraşa çalymdaş sport görnüşleri boýunça ýaryşlar geçirilipdir. Häzirki wagtda ýurdumyzdan başga-da, Gresiýa, Italiýa, Ýaponiýa, Türkiýe, Eýran, Owganystan, Russiýa, Özbegistan, Gruziýa, Ermenistan, Azerbaýjan, Gazagystan ýaly döwletlerde hem kuraş bilen giňden meşgullanylýar.
Kuraşyň türkmen milli göreşi bilen baglydygyny aýratyn nygtamak gerek. Şonuň üçin hem sportuň bu iki görnüşiniň ösüş taryhy hem birmeňzeş. Ýeri gelende aýtsak, ýurdumyzda 2014-nji ýylda Türkmen milli göreşi we guşakly göreş boýunça hem dünýä çempionaty geçirilipdi.
Şu gezekki dünýä çempionaty agram derejeleriniň 15-si boýunça geçiriler, şolaryň 7-si erkekleriň, 8-si bolsa zenanlaryň arasyndaky ýaryşlara degişlidir. Kuraş boýunça dünýä çempionatynda Türkmenistana 15 türgen wekilçilik eder.
Milli ýygyndymyzyň agzalary üçin dünýä çempionatyna taýýarlanmak babatda ähli mümkinçiliklerdir şertler döredildi. Olar Aşgabat, Arkadag we Türkmenabat şäherlerinde, şeýle hem Gyrgyzystanyň Yssyk-Köl welaýatynda türgenleşikleri geçdiler.
23 — 28-nji noýabrda paýtagtymyzda geçiriljek iri sport baýramçylygy — Kuraş boýunça XIV dünýä çempionaty ata Watanymyzyň sport abraýynyň nobatdaky gezek dabaralanmasy bolar.
Aknur ALLABERDIÝEWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň talyby.
