2023-nji ýylyň 17-nji noýabrynda paýtagtymyzyň Söwda-senagat edarasynda Eýran Yslam Respublikasynyň «Iran Prože» atly 15-nji ýöriteleşdirilen sergisi öz işine başlady. Türkmen-eýran işewürler maslahaty ykdysady hyzmatdaşlygy ösdürmekde täze mümkinçiliklere giň ýol açar. 3 gün geçiriljek foruma goňşy ýurduň ykdysadyýetiniň nebitgaz senagaty, maşyngurluşygy, metallurgiýa, maliýe we ätiýaçlandyryş, gurluşyk önümçiligi ýaly ugurlarynda iş alyp barýan döwlet we hususy düzümleriniň 100-e golaýy gatnaşýar.
Türkmenistan halkara işewür gatnaşyklarynyň gerimini günsaýyn giňeldýär. Şeýle gatnaşyklar biziň ýurdumyza içerki pudaga iň gowy dünýä tejribesini, ösen tehnologiýalary we maýa goýumlary ornaşdyrmagy üpjün edýär hem-de türkmen öndürijilerine daşary ýurtlara ýol açýar. Bu Eýran bilen hyzmatdaşlyk barada aýdylanda hem şeýledir.
Serginiň çäginde türkmen tarapy bilen eýranly işewürleriň arasynda özara hyzmatdaşlygy ösdürmek we ykdysady gatnaşyklary giňeltmek üçin esas boljak ikitaraplaýyn duşuşyklaryň birnäçesi meýilleşdirilýär.
Bellemeli zatlaryň biri-de, şu ýylyň 22 — 26-njy noýabry aralygynda Eýran Yslam Respublikasynyň Yspyhan şäherinde Türkmenistanyň Medeniýet günleri geçiriler. Türkmenistanyň Eýranda geçiriljek Medeniýet günleriniň çäklerinde taýýarlanan meýilnama esasynda ýurdumyzyň amaly-haşam sungatynyň eserleriniň we muzeý gymmatlyklarynyň sergisini, medeniýet we sungat ussatlarynyň konsertini, iki ýurduň senetçileriniň tejribe alyşmagy we döredijilik duşuşygyny, Gündogaryň beýik akyldary we nusgawy şahyry Magtymguly Pyragynyň döredijiligine bagyşlanan iki ýurduň alymlarynyň, ýazyjylarynyň hem-de şahyrlarynyň döredijilik duşuşygyny, şeýle-de türkmen filmleriniň görkezilişini geçirmek meýilleşdirilýär.
Meýlis SADYKOW,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň talyby.
