«Championat.com» -yň habar bermegine görä, Argentinaly ýyldyz futbolçy Lionel Messi öňki topardaşy Serhio Aguero tarapyndan esaslandyrylan Kru Esports kibersport toparynyň şärikdeş eýesi boldy.
Serhio Aguero toparyň Instagram sahypasyndan paýlaşan wideoýazgysynda: «Men indi Kruwyň eýesi däl, sebäbi biz indi iki bolduk» diýip, belläp geçýär. Agueronyň sözlerinden soňra Instagramda Messi bilen bilelikde düşülen surat peýda boldy.
Pandemiýa döwründe Aguero kompýuter oýunlary bilen meşgullanýan Twitch wideo akym hyzmatynda işjeňlik bilen ýaýlym alyp barmaga başlaýar. 2020-nji ýylda özüniň Kru Esports atly kiber toparyny döredýär. 2021-nji ýylyň gyşynda Aguero saglyk ýagdaýy bilen bagly karýerasyny tamamlady. 10 ýyllap ol iňlis «Mançester Siti» -niň düzüminde oýnapdy.
Serhio olimpiýa çempiony (2008), Dünýä çempionatynyň finalçysy (2014) we Amerikanyň kubogynyň eýesi (2021) bolmagy hem başarandyr.
Alp Arslan HOJAMÄMMEDOW,
Türkmenistanyň Döwlet energetika institutynyň talyby.
