Ilkinji türkmen antiwirus programmasy Türkmenistanyň Söwda-senagat edarasynyň binasynda telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel — 2023» atly XVI halkara sergisinde görkezildi.
Sergide «Tehnomerkezi» we «Türkmentehnogurluşyk» ýapyk görnüşli paýdarlar jemgyýetleri tarapyndan bilelikde taýýarlanan «Milli One» ilkinji türkmen antiwirusynyň täzelenmesi hödürlendi. Ol «Windows» we «Mac» programma üpjünçiligini goldaýan ähli kompýuterler üçin elýeterlidir.
«Milli One» antiwirusynyň web howplaryna we hüjümlere garşy gorag modullary bar, şeýle-de ol gizlin zyýanly programma üpjünçiliginden goraýar. Häzirki wagtda edara-kärhanalaryň bu antiwirus bilen bagly sargytlary artýar. Bu barada «Türkmentehnogurluşyk» ýapyk görnüşli paýdarlar jemgyýetiniň hünärmeni Şirinjemal Güjikowa «Türkmenistan» gazetine beren interwýusynda aýtdy.
«TürkmenGazet».
