Şu gün – 9-njy noýabrda paýtagtymyzdaky Söwda-senagat edarasynda Telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel — 2023» atly XVI halkara sergisi hem-de ylmy maslahaty öz işine başlady.
Hormatly Prezidentimiziň Gutlagynda bellenilişi ýaly, ösüşiň innowasion ýoluny üpjün edýän telekommunikasiýa ulgamyny kämilleşdirmekde, dünýä ähmiýetli iri taslamalary, milli maksatnamalary durmuşa geçirmekde telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel — 2023» atly XVI halkara sergisiniň hem-de ylmy maslahatyň ähmiýeti örän uludyr. Bu foruma telekommunikasiýa ulgamynda netijeli hyzmatdaşlygyň ýola goýulmagyna gyzyklanma bildirýän daşary ýurt kompaniýalarynyň we işewürleriniň gatnaşmagy muny aýdyň görkezýär.
«Türkmenaragatnaşyk» agentligi tarapyndan guralýan bu forum täze tehnologiýalary hödürlemek bilen özara maslahatlaşmak, aragatnaşygy ýola goýmak işini ýeňilleşdirmek we hyzmatdaşlygy ilerletmek üçin amatly giňişlik bolup hyzmat eder. Ylmy maslahatyň maksatnamasy halkara hyzmatdaşlyk we maýa goýum, sanlylaşdyrma, hemra tehnologiýalary we kiberhowpsuzlyk meselelerine gönükdiriler.
«TürkmenGazet».
