Güýz etýudy
Mähre çolap gözýetimin barlygyň,
Asman sahawatyn paýlaýar ýere.
Bir-birin ýassanyp ýatan baýyrlar,
Güýzüň şerbetinden bürendi zere.
Dürden zyýat damjalary ýagmyrlaň,
Atyryna atyr goşýar gülleriň.
Bugdaýlaryň sümmüllerin yralap,
Yşkdan başy aýlanypdyr ýelleriň.
Burkut baba bulutlaryn kowalap,
Bereketin gül zemine paýlaýar.
Gelinbarmak üzüm ýaly damjalar,
Mele toprak kükregini suwlaýar.
Goja ýere berip lukman şypasyn,
Güýz ýelleri çalyp geçýär surnaýy.
Telwasyndan öpülmedik güllere
Tebigat bol eçilipdir serpaýy.
***
Eje
Güller suwlansa-da soljak hamana,
Bolmasa mähirli gözleriň, eje!
Guşlaram dönäýjek müdümi lala,
Bolmasa dogaly sözleriň, eje!
Ýaz gününde aýaz girer kalbyma,
Eljirän günlerim döner salgyma,
Owaz ýetmez iň naýbaşy aýdyma,
Bolmasa hüwdüli dilleriň, eje!
Seniň bilen aýdyň hyýal, pikirim,
Waspyňy sözleýär her bir setirim,
Küýsedim, bişirýän ýagly petiriň,
Ýugran şol gataňsy elleriň, eje!
Boý boýlajak baglar köpeler bahar,
Içinde torgaýlar lälesin kakar,
Şapak şuglasyna çümer her säher,
Seniň bilen mahmal güllerim, eje!
Gojaman dünýäniň binýady berkden,
Jyga sen, Zemine berilen gökden,
Enesiz ýazlaram binesip görkden,
Senden görk alypdyr güllerem, eje!
***
PURSAT
Çagalykda çaga saýan gurjagyň,
Gujagyňdan sowaşyşy juda geň.
Boýnuýogyn säginmezek möwritler
Haýdap barýar öňküsinden has gedem.
Seret, eýýäm Gün görkezdi ýüzüni,
Gözellik dünýäniň goýnundan jyklap.
Ýelpewajyn ýelpäp säher şemaly,
Oýandyrýar ümsümligi gyjyklap.
Arylar öpüp ýör gülleriň lebin,
Otyr ümmüldeşip goşa gumrular.
Herekete berip täsin dünýäni,
Säher galdy alyslarda gundalyp.
El tutşan bulutlar gidende ötä,
Eýýäm Güneş agan eken öýleden.
Şeýdip ýazyň hasaplanan gününiň,
Galyp barýar ýene biri beýlede.
Pursatlara uslyp bilmän säginme,
Ugrady Gün ýere berip eňegin.
Barsa gelmez ýola ugran her güni,
Gyzlyň gyrlan gyryndysna deňedim.
Bibi TAGANOWA,
Türkmen oba hojalyk institutynyň Jemgyýeti öwreniş ylymlary kafedrasynyň mugallym-öwrenijisi.
