2023-nji ýylyň 1-nji noýabrynda paýtagtymyzda geçirilmegi meýilleşdirilýän Merkezi Aziýa döwletleriniň we Koreýa Respublikasynyň daşary işler ministrleriniň derejesinde «Merkezi Aziýa — Koreýa Respublikasy» 16-njy hyzmatdaşlyk forumy döwletara gatnaşyklaryň netijeli häsiýete eýediginiň aýdyň beýanydyr.
Geçen ýyllarda bilelikdäki tagallalar netijesinde syýasy, söwda-ykdysady, medeni-ynsanperwer ulgamlarda ikitaraplaýyn gatnaşyklaryň strategik hyzmatdaşlyk derejesine ýetirilendigini bellemelidiris. Biziň ýurtlarymyzyň arasynda hyzmatdaşlygyň pugta şertnama-hukuk binýady döredildi. Olar dürli ugurlary gurşap alýar. Bu bolsa hyzmatdaşlygyň däp bolan, şeýle hem täze ugurlarynda bilelikde işlemek üçin ägirt giňişligiň bardygyny görkezýär.
2021-nji ýylyň 30-njy noýabrynda Duşenbe şäherinde, 2022-nji ýylyň 25-nji oktýabrynda Koreýa Respublikasynyň Pusan şäherinde daşary işler ministrleri derejesinde «Merkezi Aziýa — Koreýa Respublikasy» hyzmatdaşlyk forumynyň mejlislerini aýratyn nygtamak gerek.
Biziň ýurtlarymyz söwda-ykdysady hyzmatdaşlygy ozal gazanylan ylalaşyklara we maksatnamalara laýyklykda ösdürýärler. Soňky döwürde ikitaraplaýyn söwda dolanyşygynyň möçberiniň artýandygy munuň aýdyň subutnamasydyr. Ulag, logistika, saglygy goraýyş, lukmançylyk, howanyň üýtgemegi we daşky gurşawy goramak, maglumat-aragatnaşyk tehnologiýalary, bilim-ylym, şeýle hem syýahatçylyk ýaly möhüm ugurlar Türkmenistanyň başlyklyk etmeginde 1-nji noýabrda paýtagtymyzda geçiriljek «Merkezi Aziýa — Koreýa Respublikasy» 16-njy hyzmatdaşlyk forumynda ileri tutulýan ugurlaryň hataryndadyr.
Forumyň yzysüre bolsa, has takygy, 3 — 5-nji noýabr aralygynda Aşgabatda Koreýanyň Medeniýet hepdeligi hem geçiriler. Munuň özi halkara gatnaşyklarynda medeni-ynasanperwer ulgama möhüm ornuň degişlidigini aýdyň görkezýär.
Ogulnar ORAZMYRADOWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby.
