2023-nji ýylyň 13-nji oktýabrynda Bişkekde GDA-nyň Döwlet Baştutanlarynyň Geňeşiniň nobatdaky mejlisi geçirildi. .
Sammitiň barşynda bolan pikir alyşmalaryň çäklerinde Arkalaşygyň şu ýylyň dowamynda alyp baran işleriniň jemleri seljerildi. Şeýle-de geljek ýyl üçin ileri tutulýan wezipeler anyklaşdyrylyp, halkara we sebit durmuşynyň derwaýys meseleleri ara alnyp maslahatlaşyldy. Jenaýat we Terrorçylykdan alnan girdejileriň kanunlaşdyrylmagy we kazyýet işleriniň çäginde GDA-nyň gatnaşyjylary – Döwletleriň utgaşdyryjy geňeşini döretmek baradaky şertnama seredilip, häzirki zaman dünýäsiniň terrorçylyk howpuny, neşe serişdeleriniň bikanun dolanyşygyny, adam söwdasyny ekstremistik elementleriň aralaşmagy ýaly wehimlere garşy durmak, kiberhowplar we beýleki wehimler bilen baglanyşykly meseleler ara alnyp maslahatlaşyldy. Derwaýys meseleleri çözmegiň ýollaryny gözlemek boýunça teklipleri öňe sürmek hem-de Arkalaşygyň çäklerinde berk we uzak möhletli parahatçylygy, howpsuzlygy üpjün etmäge gönükdirilendigine, tutuş dünýäde parahatçylyk we ylalaşyklylyk diplomatiýasyny ilerletmäge uly goşant bolup hyzmat edýär.
GDA-nyň Daşary işler ministrleriniň geňeşiniň ýygnagynda Türkmenistanyň wekiliýetine Daşary işler ministri Raşid Meredow ýolbaşçylyk etdi. Duşuşykda halkara we sebit gün tertibiniň möhüm taraplary, şeýle hem GDA-nyň hyzmatdaşlygy ýaly meseleler dogrusynda pikir alyşyldy. Geljek döwür üçin syýasat, söwda, ykdysadyýet we medeniýet ýaly ugurlarynda geljekde köptaraplaýyn hyzmatdaşlygyň iň möhüm ugurlary kesgitlenildi. Maslahatyň dowamynda GDA ýurtlarynyň arasyndaky hyzmatdaşlygy pugtalandyrmaga gönükdirilen täze pikirler we taslamalar teklip edildi. Ylym we bilim pudagynda özara gatnaşyklaryň geljegi hem ara alnyp maslahatlaşyldy.
Jenaýatçylyga garşy göreşmek boýunça 2024–2028-nji ýyllar üçin döwletara bilelikdäki çäreler maksatnamasyna gol çekmek hem-de Arkalaşygyň «Parahatçylygy berkitmäge goşant goşmak» medalyny döretmek baradaky pikirleri meýilleşdirilýär.
GDA-nyň Baş sekretary S.Lebedew 2024-nji ýylda Garaşsyz Döwletleriň Arkalaşygyna başlyklyk etmegiň Russiýa Federasiýasyna geçýändigi hem-de GDA-nyň döwlet Baştutanlarynyň Geňeşiniň nobatdaky mejlisini 2024-nji ýylyň 8-nji oktýabrynda Moskwa şäherinde geçirmek baradaky çözgütleri beýan etdi. Sammitiň jemleri boýunça resminamalaryň birnäçesi kabul edilendir.
Maral BAGYROWA,
Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň talyby.
