Halk arasyndaky «Kitap okamaýan görýänini görer, kitap okaýan dünýäni görer», «Kitap okamaýan bir dil biler, kitap okaýan kän dil biler», «Kitap geçeni, geljegi öwredýän dana», «Okaýan il ozar, okamaýan il tozar» ýaly many-mazmunly jümleler ýöne ýerden dörän däldir.
Kitap bahasyna ýetip bolmajak baýlyk. Ynsanyň çyn dosty, ýakyn syrdaşy. Dünýä belli alymlaryň biri: «Sen haýsy kitaby okaýanyňy aýtsaň, men seniň kimdigiňi aýdaryn» diýipdir. Megerem, kitap ynsanyň häsiýetini gowulyga tarap üýtgedip bilýän güýçdür. «Miweli agajyň başy aşak» diýlişi ýaly, kitaby köp okaýan adam agramly görünýär. Dünýä belli dana Platon: «Men kitaby okadygymça, hiç zat bilmeýänimi bildim» diýipdir. Meşhurlygy bilen özüni dünýä ykrar etdiren belli alymlaryň, danalaryň, akyldarlaryň kitap köp okap şol derejä ýetendigine göz ýetirýäris.
Durmuşyň örän köpdürli wakalary bar, emma, olaryň hemmesini bir adam öz ömründe başyndan geçirip bilmeýär. Şonuň üçin biz başgalaryň durmuşynda bolup geçen wakalary kitapdan okap, öwrenip, olary dost maslahaty hökmünde ulanyp bilýäris.
Türkmen halky kitaphon halk. Kitaphonlyk — asyrlaryň jümmüşinden geçip, biziň günlerimize gelip ýeten, bize ata-babalarymyzdan miras galan ýagşy häsiýetdir. Muňa mysal hökmünde Nurmyrat Saryhanowyň «Kitap» hekaýasyny hem görkezmek bolar. Her bir adamyň hem kitap bilen dostlaşmagy esasynda öz durmuşyna özboluşly öwüşgin çaýýanlygy ikuçsuzdyr.
Häzirki döwürde ýurdumyzyň ýaşlarynyň ylymly-bilimli bolmaklary üçin, halkymyzyň kitaba bolan söýgüsiniň mundan beýlägem artmagy üçin Gahryman Arkadagymyzyň hem-de hormatly Prezidentimiziň amala aşyrýan uly işlerine günüň-güni şaýat bolýarys. Ýurdumyzyň welaýatlarynda, paýtagtymyzda dünýä ülňülerine laýyk gelýän, doly derejede täze tehnologiýalar bilen üpjün edilen, şeýle-de kitap gory has-da köpeldilen milli kitaphanalarymyz okyjylarymyzyň hyzmatynda.
Nartäç GURBANBERDIÝEWA,
Türkmenbaşy etrabynyň 18-nji orta mekdebiniň kitaphanaçysy.
