Aýdym-saz äleminiň abraýly baýraklaryndan biri bolan «MTV Music Video» aýdym-saz baýraklarynyň ýeňijilerine baýrak gowşuryş dabarasy geçirildi. Niki Minažyň alyp baran dabarasynda meşhur aýdymçy Taýlor Swift 11 ugurdan dalaşgär görkezilen bu bäsleşigiň 9-synda ýeňiş gazanmagy başardy. Swiftiň «Anti-Hero» aýdymy ýylyň wideosy, ýylyň aýdymy, iň gowy pop, iň gowy wizual effektler, iň gowy režissýor, iň gowy operator diýen ugurlarda «MTV Music Video» baýragyna laýyk görüldi.
Bäsleşigiň şu ýylky geçirilen tapgyry taryhda ilkinji gezek ýylyň sungat işgäri baýragyna dalaşgär görkezilenleriň ählisi zenan aýdymçylar bolupdy. Beýonse, Doja Kat, Karol G, Niki Minaž, Şakira dagydan öňe saýlanan Taýlor Swift baýragy gazanmagy başardy.
Ýylyň täze sungat işgäri diýlen ugurda baýrak «Ice Spice» ady bilen belli bolan ýaş zenan aýdymça gowşuryldy. Iň gowy hip hop baýragyna «Super Freaky Girl» aýdymy üçin Niki Minaž, iň gowy «R&B» baýragyna «Shirt» aýdymy bilen SZA, iň gowy K-pop baýragyna bolsa «Stray Kids» topary laýyk görüldi.
Ogulşat ATAÝEWA,
TOHI-niň Weterinar lukmançylygy fakultetiniň sanly dolandyryş taýýarlyk ugrunyň 1-nji ýyl talyby.
