Ählimize mälim bolşy ýaly, 2023-nji ýylyň 2-nji oktýabryndan 2024-nji ýylyň 28-nji mart aralygynda Katar Döwletiniň Doha şäherinde «EXPO-2023» halkara sergi «Daşky gurşawyň hatyrasyna ýaşyl tebigat» atly şygar bilen geçiriler. Sergä gatnaşmak üçin 70-den gowrak ýurtdan wekiliýet çagyrylypdyr. Ýakynda Türkmenistanyň Söwda-senagat edarasynyň başlygy M.Gurdowyň ýolbaşçylygyndaky Türkmenistanyň wekiliýeti, Halkara sergä taýýarlyk meselelerini ara alyp maslahatlaşmak bilen baglanyşykly geçirilen maslahata gatnaşdy.
Maslahatyň gün tertibine gurluşyk meýdançasyny EXPO zolaklaryny dolandyrmak bilen baglanyşykly guramaçylyk, saglyk we howpsuzlyk, ulag, logistika we aragatnaşyk meseleleri hem-de bu halkara sergisiniň geçýän wagtynda çärä gatnaşýanlara hödürlenýän hyzmatlar we başga-da birnäçe soraglara garaldy.
Maslahata serginiň Baş Komissary Onuň Alyhezreti Bader Al Dafa, Halkara sergi býurosynyň Baş Sekretary Dimitriý Kerkenzes, Halkara bagbançylyk birleşiginiň Baş Sekretary Braýrklif gatnaşdy. Şeýle-de, saparyň dowamynda Türkmenistanyň Söwda-senagat edarasynyň başlygy M.Gurdow bilen Baş Komissar jenap Bader Al Dafanyň arasynda ikitaraplaýyn duşuşyk geçirildi. Duşuşygyň dowamynda taraplar Türkmenistanda we Katar döwletinde aýratyn orun berilýän daşky gurşawy goramak boýunça alnyp barylýan işleriň ähmiýetini ara alyp maslahatlaşdylar, Şeýle hem Türkmenistanyň Milli gününde geçirilmegi meýilleşdirilýän çärelere uly üns berildi.
Duşuşygyň ikinji gününde oňa gatnaşyjylar üçin gurluşyk we daşky bezeg işleriniň gidişi bilen tanyşmak üçin Sergi meýdançasyna gezelenç guraldy.
Kataryň Doha şäherinde geçiriljek «EXPO-2023» halkara sergisine gatnaşmak üçin «Söwda öýi» kärhanasy Türkmenistanyň milli pawilýonyny gurar.
Pirnazar AKMÄMMEDOW,
Türkmen döwlet binagärlik-gurluşyk institutynyň talyby.
