VIII Gündogar ykdysady forumy 10-13-nji sentýabry aralygynda Uzak Gündogar Federal Uniwersitetiniň (FEFU) şäherçesindäki Wladiwostokda dowam edýär. Ykdysady foruma birnäçe ýurduň wekiliýetleri gatnaşýar. Gündogar ykdysady forumy – Russiýa we global maýa goýum jemgyýetleriniň arasynda gatnaşyklary döretmek we berkitmek, Russiýanyň Uzak Gündogaryň ykdysady mümkinçiliklerine giňişleýin baha bermek, ösüşiň ileri tutulýan ugurlarynda maýa goýum mümkinçiliklerini we iş şertlerini görkezmek üçin möhüm halkara platformadyr.
VIII Gündogar ykdysady forumynyň şygary: «Hyzmatdaşlyga, parahatçylyga we abadançylyga tarap». Primorýe ülkesiniň häkimliginiň metbugat gullugynyň habaryna görä, forumyň çägindäki maksatnamalara Belarussiýadan, Wýetnamdan, Hindistandan, Gazagystandan, Hytaýdan, Demirgazyk Koreýadan, Laosdan, Mýanmadan, Singapurdan we Filippinlerden gelen myhmanlar gatnaşýar. Forumyň çäklerinde daşary ýurt wekiliýetleri bilen duşuşyklar hem geçirilýär. Maslahatda gyzykly çekişmelere garaşylýar.
Forum Uzak Gündogaryň ykdysadyýetiniň ösmegine ýardam bermek we Aziýa-Ýuwaş umman sebitinde halkara hyzmatdaşlygyny giňeltmek maksady bilen 2015-nji ýylyň 19-njy maýynda Russiýanyň Prezidenti Wladimir Putiniň karary bilen döredilendir.
Maksat AKYÝEW,
S.A.Nyýazow adyndaky TOHU-nyň Türkmenabat agrosenagat orta hünär okuw mekdebiniň mugallymy.
