Türkmenistanda her ýylyň 12-nji awgustynda ýokary derejede dabaraly bellenilýän Hazar deňziniň güni mynasybetli Awazada «Hazar deňzi — parahatçylyk we dostluk deňzi» atly ylmy-amaly maslahat geçirilýär.
Şu günler Hazar deňziniň güni mynasybetli berkarar Watanymyzda dürli çäreler geçirilýär. Şolaryň hatarynda ylmy maslahatlary, medeni we sport çärelerini görkezmek bolar.
Hormatly Prezidentimiziň «Hazar deňzi — parahatçylyk we dostluk deňzi» atly ylmy-amaly maslahata gatnaşyjylara iberen Gutlagynda bellenilişi ýaly, Türkmenistan Hazarýaka sebitde bolup geçýän ähli möhüm hereketlere işjeň gatnaşyjy bolmak bilen, bu ugurda parahatçylyga, ylalaşyga, özara ynanyşmaga we netijeli halkara hyzmatdaşlyga ygrarlydygyny aýdyň görkezýär. Mälim bolşy ýaly, biziň ýurdumyz Hazarýaka döwletleriň öňünde duran ähli wajyp meseleleri bilelikde ara alyp maslahatlaşmak maksady bilen, 2002-nji ýylda Aşgabatda birinji Hazar sammitini geçirdi. Bu taryhy waka Hazar gün tertibiniň ähli ugurlary boýunça uzak möhletleýin geljek üçin yzygiderli hyzmatdaşlygyň berk binýadyny goýdy hem-de Hazarda özara arkalaşykly hereket etmek üçin köp sanly meseleleriň çözülmegine uly badalga berdi.
«TürkmenGazet».
