Seni
Ge:r diýdim boýçyň deregine,
Möý çolaşsa kerebine…
Ýordum ýördüm geleriňe,
Yrymlar yrmady seni.
Söýgüň täk kepili bolup,
Gitdiň meni menden alyp,
Gijäň ser-sepili bolup,
Düýşlerim görmedi seni.
Seni alyp giden günler,
Üýşüp ýatyr münber-münber,
Ýalbardym, gaýdyp bersinler…
Gaýtaryp bermedi seni.
Ne hally, ne halsyzam men,
Ne kemli, ne kemsizem men,
Oň üstüne sensizem men,
Gör, nirä germedi seni?!
Ilip gepiň aňňalyna,
Dilim gitdi taňňaýyma,
Täleý ahyr maňlaýyma,
Gatmady, garmady seni.
***
Içim tüýdülensoň düşýärmi saçym?
Seni gözleý-gözleý äýnekli gözüm.
Meni bir zat heläk edýär salymda,
Nähili zatdygny bilemok özüm.
Düşündirjek bolsam ady ýok sözde,
Keşbi ýok, reňki ýok, binjalyk ýöne,
Men ony hut onuň özünden başga,
Deňäýin nämä?!
***
Ejeme arzym
Kysmat sala salmaz bize,
Täze goşgy — köne yza,
Ne ynjalyk, ne-de maza,
Ne-de ýatyp bilýän eje.
Agtarar eken ýitiren,
Men indi nirä giderin?!
Köňlüň karar tapjak ýerin,
Gezýän tapyp bilmän eje.
Süýräp günleň golam-goşun,
Üç ony tegelär ýaşym,
Bir haýyrly işiň başyn,
Geçdim tutup bilmän eje.
Ömür — oýun. Alar-almaz,
Pikirlem kän bolar-bolmaz,
Kütek — sy:har. Keser — almaz.
Içim ýanyp gülýän eje.
Syrçasy ýok, guduk açan,
Senden başga bilmez içim,
Näçe öwrüm, şonça göçüm,
Geçdim utup bilmän eje.
***
Meniň
Günler geliş-baryş edip,
Boýumy bir garyş edip,
Gerdenime geriş edip,
Göterenim nämedi meň ?!
Dur, meni beýle gystama,
Geleýin ahyr estime,
Ýük bolup ýeriň üstüne,
Oturanym nämedi meň?!
Kişmişler heniz üzümkä,
Kysmat diýdiler biziňkä,
Nyrhy bolýandyr sözüň kä,
Bitirenim nämedi meň?!
Erk edip üstünden erkiň,
Berip agyr günleň merkin,
Tapanyny da:şar her kim,
Getirenim nämedi meň?!
Siltedi garsa topuldym,
Duşady, ýene sypyndym,
Bilmedim näme tapanmy,
Ýitirenim nämedi meň?!
Ogulnur ATAÝEWA,
Magtymguly adyndaky Türkmen döwlet uniwersitetiniň 3-nji ýyl talyby.
