Ýakynda Türkmenistanyň Prezidentiniň «Türkmeniň Altyn asyry» atly bäsleşiginiň çäklerinde yglan edilýän «Ýaňlan, Diýarym! — 2023» telebäsleşiginiň Mary hem-de Lebap welaýat tapgyrlary geçirildi. Welaýatlardaky «Türkmeniň ak öýi» binalarynda guralan bäsleşiklere şowhunly, joşgunly häsiýet mahsus boldy.
Göwün göteriji hoş owazlara beslenen bäsleşige etrap, şäher tapgyrlarynda ýeňiş gazanyp, öňe saýlanan ýaş höwesjeň aýdymçylaryň 10-sy gatnaşyp, ruhubelentlik bilen çykyş etdiler. Bäsleşigiň dowamynda aýdym-saza höwesli ýaş zehinleriň sahnada özlerini alyp baryşlaryna, egin-eşiklerine, aýdymlaryň sözlerini dogry aýdyşlaryna eminler topary tarapyndan mynasyp baha berildi.
Şeýlelikde, Mary welaýatyndan — Murgap etrabynyň Oguzhan şäherçesiniň medeniýet merkeziniň aýdymçysy Nurýagdy Bekiýew hem-de Tagtabazar etrabyndan höwesjeň aýdymçysy Tylly Çaryýewa, şeýle-de Lebap welaýatyndan — Halaç etrabynyň medeniýet merkeziniň höwesjeň aýdymçysy Saparmyrat Tekäýew bilen Saýat etrabynyň medeniýet merkeziniň höwesjeň aýdymçysy Babajan Rozyýew ýeňijiler diýlip yglan edildi. Olar «Ýaňlan, Diýarym! — 2023» telebäsleşiginiň döwlet tapgyryna gatnaşmaga hukuk gazandylar. Bäsleşige gatnaşan ýaş aýdymçylara hormatly Prezidentimiziň adyndan gymmat bahaly sowgatlar gowşuryldy.
«TürkmenGazet».
