Özbegistan Respublikasynyň Merkezi saýlaw topary düýn – 9-njy iýulda geçirilen Prezident saýlawlarynyň tutuş ýurtda 784 saýlaw uçastogynda geçendigini mälim etdi. Şeýlelikde, Özbegistanda möhletinden öň geçirilen saýlawlar tamamlandy.
Saýlawlara häzirki Prezident Şawkat Mirziýoýew, Halk Demokratik partiýasynyň dalaşgäri Ulugbek Inoýatow, Ekologiýa partiýasynyň dalaşgäri Abduşukur Hamzaýew we “Adolat” Sosial Demokratik partiýasynyň dalaşgäri Rob Mahmudowa gatnaşdy.
Özbegistanyň häzirki Prezidenti Şawkat Mirziýoýew geçirilen nobatdan daşary Prezident saýlawlarynda 87,5% ses alyp, ýeňiş gazandy diýip, Merkezi saýlaw toparynyň başlygy Zainiddin Nizamhojaýew habar berdi.
— Deslapky maglumatlara görä, Mirziýoýewe 13 625 055 adam ýa-da ses berişlige gatnaşan saýlawçylaryň 87,5%-i ses berdi – diýip, ol belledi.
Prezident saýlawlarynda 19,5 milliondan gowrak saýlawçy hasaba alnyp, şolardan 15 671 405 ses berdi. 28-nji iýundan 5-nji iýul aralygynda 800 müňden gowrak saýlawçy, şol sanda daşary ýurtlarda ýaşaýan 188 müň töweregi saýlawçy wagtyndan öň ses berdi.
Ýatlamak gerek, aprel aýynda Özbegistanda Konstitusiýany üýtgetmek, şol sanda Özbegistanyň Prezidentiniň ygtyýarlyk möhletini bäş ýyldan ýedi ýyla çenli uzaltmak boýunça sala salşyk geçirildi. Teklip edilen üýtgetmeleri saýlawçylaryň 90,2%-i goldady.
Maý aýynyň başynda Mirziýoýew, Konstitusiýa girizilen üýtgetmelere bil baglap, möhletinden öň Prezident saýlawlaryny geçirmek barada karara gol çekdi.
«TürkmenGazet».
