Argentinaly Lionel Messi Star+ striming hyzmatynyň «Los Protectores» serialynda surata düşdi. Bu bolsa Messiniň ilkinji aktýorlyk tejribesi boldy. Bu barada «Goal» sport neşiri habar berýär.
«Los Protectores» serialy soňky döwürde işleri başa barman, bankrot bolmaga ýakyn bolan 3 sany futbol agenti barada gürrüň berýär. Gahrymanlar öz karýeralaryny halas etmek we täze futbol ýyldyzyny tapmak üçin birleşýärler.
Messi serialda onuň ikinji möwsüminiň birinji epizodynda epizodiki keşpde peýda bolup, öz häsiýetinde oýnapdyr. Sýužet boýunça agentler türgen bilen duşuşmak üçin Pariže gelýärler we oňa ýaş futbolçylary goldamak taslamasyna gatnaşmagy teklip edýärler.
Ilkibaşda Messi bu başlangyja gyzyklanma bildirýär, ýöne soň gahrymanlar ony surata düşmek haýyşlary bilen biynjalyk edip başlaýarlar. Agentleriň biri bolsa ýaşlara kömek etmek üçin taslamanyň deregine öz biznes meýilnamasyny hödürläp başlaýar, bu hem futbolça ýaramaýar.
Mundan ozal Messi diňe mahabat wideolarynda surata düşüpdi.
Kakajan KAKAJANOW,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby.
